ලෝක වෙළඳපොළට තෙල් සපයන ප්රධානතම නෞකා මාර්ගයක් වන හෝමුස් සමුද්ර සන්ධිය (Strait of Hormuz) වහාම විවෘත නොකළහොත්, ඉරානයේ යටිතල පහසුකම් ඉලක්ක කර ගනිමින් දැවැන්ත ප්රහාර මාලාවක් දියත් කරන බවට ඇමරිකානු ජනාධිපති ඩොනල්ඩ් ට්රම්ප් අතිශය දරුණු අනතුරු ඇඟවීමක් කර තිබේ.
ෆොක්ස් නිවුස් (Fox News) නාලිකාව සමඟ සම්මුඛ සාකච්ඡාවකට එක්වෙමින් ජනාධිපතිවරයා සඳහන් කළේ, සිය අවසන් නිවේදනය ක්රියාත්මක වන අප්රේල් 06 වැනිදාට පෙර ඉරානය මීට එකඟ නොවන්නේ නම් “අඟහරුවාදා දිනය ඉරානයේ බලාගාර සහ පාලම් විනාශ කරන දිනය” බවට පත් කරන බවයි.
ඉරානයට “නිරයේ අත්දැකීම” ලබා දෙන බවට ඔහු මීට පෙර කළ ප්රකාශය ද මෙහිදී යළිත් අවධාරණය කළේය. කෙසේ වෙතත්, දෙරට අතර එකඟතාවයකට පැමිණීමට තවමත් යම් අවස්ථාවක් පවතින බව ද ඔහු එහිදී ඉඟි කර තිබේ.
මේ අතර, ඉකුත් සිකුරාදා ඉරානයට ඉහළින් පියාසර කරද්දී බිම හෙළන ලද ඇමරිකානු ප්රහාරක යානයේ සිටි සහ සෙවීමේ මෙහෙයුම් අතරතුර අතුරුදහන් වූ ගුවන් භටයා නිරුපද්රිතව බේරාගත් බව ජනාධිපති ට්රම්ප් තහවුරු කළේය. ඔහු “සම්පූර්ණ සුවයෙන් සහ ආරක්ෂිතව” (SAFE and SOUND) පසුවන බව ජනාධිපතිවරයා ප්රකාශ කළ අතර, ඒ සමඟම දින කිහිපයක් පුරා පැවති දැඩි අවදානම් සහගත මෙහෙයුම අවසන් විය.
දෙරට අතර පවතින ගැටුමේ ප්රධාන සටන් බිම දැන් මුහුද දෙසට සංකේන්ද්රණය වී ඇති බව විදෙස් වාර්තාකරුවෝ පෙන්වා දෙති. හෝමුස් සමුද්ර සන්ධියේ මුවවිට ආසන්නයේ විශාල නෞකා ප්රමාණයක් නැංගුරම් ලා ඇති අයුරු නිරීක්ෂණය වන අතර, ඉරානය විසින් මෙම මුහුදු මාර්ගය අවහිර කර තැබීම ගෝලීය බලශක්ති සැපයුමට දැඩි බලපෑමක් එල්ල කර තිබේ.
ඇමරිකාව සිය අවසන් නිවේදනය නිකුත් කර ඇති පසුබිමක, ඉදිරි පැය කිහිපය කලාපීය සාමය සම්බන්ධයෙන් තීරණාත්මක වනු ඇත.
