මුළු මහත් ශිෂ්ටාචාරයක්ම විනාශ කරන බවට ඇමෙරිකානු ජනාධිපති ඩොනල්ඩ් ට්රම්ප් පැනවූ අවසන් නිවේදනය (Deadline) හමුවේ, ලෝකවාසීන් දැඩි භීතියෙන් පසුවූ රාත්රියක අවසානයේ ඇමෙරිකාව සහ ඉරානය සති දෙකක සටන් විරාමයකට එකඟතාව පළ කර තිබේ.
හෝමුස් සමුද්ර සන්ධිය හරහා නෞකා ගමනාගමනයට අවසර දෙන්නේ නම් මෙම සටන් විරාමයට තමන් එකඟ වන බව ජනාධිපති ට්රම්ප් ප්රකාශ කළේය. ඊට ප්රතිචාර දක්වමින් ඉරාන විදේශ අමාත්ය සෙයියඩ් අබ්බාස් අරාග්චි සඳහන් කළේ ඉරානයට එල්ල වන ප්රහාර නතර කරන්නේ නම් තම රට ද සටන් විරාමයට සූදානම් බවයි.
පාකිස්ථානයේ තීරණාත්මක මැදිහත්වීම
මෙම අර්බුදයේදී මධ්යස්ථ පාර්ශවයක් ලෙස කටයුතු කළ පාකිස්ථානය, ට්රම්ප්ගේ අවසන් නිවේදනය සති දෙකකට කල් දමන ලෙස කළ ඉල්ලීමත් සමඟ දෙපාර්ශ්වයටම ගෞරවාන්විතව පසුබැසීමට අවස්ථාවක් උදා විය. ලබන සිකුරාදා ඉස්ලාමාබාද් නුවරදී පැවැත්වෙන සාකච්ඡා සඳහා පාකිස්ථානය දෙපාර්ශ්වයටම ආරාධනා කර තිබේ.
සටන් විරාමය මැදත් ප්රහාර දිගටම
සටන් විරාම නිවේදනය නිකුත් වුවද, කලාපයේ රටවල් රැසකින් අද (08) උදෑසනත් ප්රහාර වාර්තා විය.
ඊශ්රායලය තවදුරටත් ඉරානයට ප්රහාර එල්ල කරන බව විදෙස් මාධ්ය වාර්තා කරයි. ඊශ්රායලය සටන් විරාමයට එකඟ වූ බවට පුවත් පළ වුවද, ඔවුන්ගෙන් තවමත් නිල ප්රතිචාරයක් ලැබී නැත.
ඊශ්රායලයේ ජෙරුසලම් නගරයේ ප්රබල පිපිරීම් රැසක් සිදුව ඇති අතර නගරය පුරා අනතුරු ඇඟවීමේ සංඥා නිකුත් කර තිබේ.
බහරේනය, කටාර් සහ එක්සත් අරාබි එමීර් රාජ්යය වෙත එල්ල වූ මිසයිල සහ ඩ්රෝන ප්රහාර රැසක් හඳුනාගෙන විනාශ කිරීමට ඔවුන්ගේ ආරක්ෂක පද්ධති සමත්ව ඇත.
සවුදි අරාබියේ රියාද් නුවර ඇතුළු ප්රදේශ කිහිපයකට අනතුරු ඇඟවීමේ සංඥා නිකුත් කෙරිණි.
ඉරාන වැසියන්ගේ මිශ්ර ප්රතිචාර
ට්රම්ප්ගේ අවසන් නිවේදනය අවසන් වන තෙක් එරට වේලාවෙන් අද අලුයම 3:00 වනතුරු ඉරාන වැසියන් දැඩි නොසන්සුන්තාවයකින් පසුවිය. බලාගාර සහ මාර්ග විනාශ වනු ඇතැයි බියෙන් ඔවුන් ඉටිපන්දම්, ආහාර සහ ජලය රැස් කරගෙන සිටි අතර, සටන් විරාමයත් සමඟ බලාගාර ඉලක්ක නොවන බව දැනගන්නට ලැබීම ඔවුන්ට විශාල සහනයක් විය.
කෙසේ වෙතත්, මෙම යුද්ධය හරහා පාලන තන්ත්රයේ වෙනසක් බලාපොරොත්තු වූ පිරිස් පවසන්නේ, යුද්ධයෙන් තුවාල ලැබූ සහ ආර්ථිකය කඩා වැටුණු පාලනයක් යටතේ ජනතාවට වඩාත් දරුණු තත්ත්වයකට මුහුණ දීමට සිදුවනු ඇති බවයි.
