එළඹෙන සිංහල සහ හින්දු අලුත් අවුරුදු උත්සව සමය වෙනුවෙන් ජනතාවට සහනයක් සැලසීමේ අරමුණින් පෙට්රල් වාහන සඳහා QR කේතය (QR Code) භාවිතයෙන් තොරව ඉන්ධන නිකුත් කිරීමට ලංකා ඛනිජ තෙල් නීතිගත සංස්ථාව තීරණය කර තිබේ.
මෙම විශේෂ සහනය අද (11) මධ්යම රාත්රී 12:00 සිට ක්රියාත්මක වන අතර එය එළඹෙන අප්රේල් මස 18 වැනිදා දක්වා වලංගු වන බව සංස්ථාව සඳහන් කරයි. මේ අනුව උත්සව සමයේ ගමන් බිමන් යන ජනතාවට QR කේතයේ සීමාවන්ගෙන් තොරව ඉන්ධන ලබාගැනීමේ අවස්ථාව හිමිවේ.
QR කේතය ඉවත් කළ ද, ඉන්ධන පිරවුම්හල් අසල තදබදය පාලනය කිරීම සඳහා “ඔත්තේ – ඉරට්ටේ” (Odd-Even) ක්රමය අඛණ්ඩව ක්රියාත්මක කිරීමට තීරණය කර ඇත. ඒ අනුව,
- වාහන අංක තහඩුවේ අවසාන අංකය ඔත්තේ අංකයක් (1, 3, 5, 7, 9) වන වාහන සඳහා අදාළ දිනවලදී ද,
- අවසාන අංකය ඉරට්ටේ අංකයක් (0, 2, 4, 6, 8) වන වාහන සඳහා අදාළ දිනවලදී ද ඉන්ධන ලබාගත හැකිය.
උත්සව සමයේ ඉන්ධන පිරවුම්හල් අසල පෝලිම් ඇතිවීම වැළැක්වීමට සහ ජනතාවට වඩාත් කාර්යක්ෂම සේවාවක් ලබාදීමට මෙම පියවර ගත් බව බලධාරීන් වැඩිදුරටත් කියා සිටී.
කෙසේවුවද ඩීසල් වාහන සඳහා මෙවැනි සහනයක් ක්රියාත්මක නොවන අතර ඩීසල් වාහන සඳහා පෙර පරිදිම QR කේතය (QR Code) මගින් නියමිත කෝටාවට අනුව ඉන්ධන ලබාගත යුතුය. එමෙන්ම ඩීසල් වාහන සඳහා ද මෙම කාලසීමාව තුළ ඉන්ධන ලබාගැනීමේදී වාහන අංක තහඩුවේ අවසාන අංකය අනුව ක්රියාත්මක වන “ඔත්තේ – ඉරට්ටේ” ක්රමය අදාළ වේ.
එබැවින් ඔබ ඩීසල් වාහනයක් භාවිතා කරන්නේ නම්, උත්සව සමය තුළ ගමන් බිමන් යාමට පෙර ඔබේ QR කේතයේ ඉතිරිව ඇති ඉන්ධන ප්රමාණය පිළිබඳව සැලකිලිමත් වීම වැදගත්ය.
