හයිටි රාජ්යයේ උතුරුදිග මිලොට් (Milot) නගරයේ පිහිටි ඓතිහාසික ලෆෙරියර් බලකොටුව අසල ඊයේ (11) සිදුවූ දරුණු තෙරපීමකින් පුද්ගලයන් 30 දෙනෙකු පමණ මියගොස් ඇති බව වාර්තා වේ. මියගිය සංඛ්යාව මීට වඩා ඉහළ යා හැකි බව හයිටි සිවිල් ආරක්ෂක අංශයේ ප්රධානී ජීන් හෙන්රි පෙටිට් මහතා අනතුරු අඟවා ඇත.
බලකොටුව නිර්මාණය කිරීම සැමරීම වෙනුවෙන් සංවිධානය කර තිබූ මෙම උත්සවය සඳහා විශාල වශයෙන් සිසුන් සහ සංචාරකයින් සහභාගී වී සිටි බව වාර්තා වේ. විශේෂයෙන්ම සමාජ මාධ්ය ඔස්සේ මෙම උත්සවය ප්රසිද්ධ කර තිබීම නිසා වෙනදාට වඩා වැඩි ජනකායක් බලකොටුව වෙත පැමිණ ඇත.
බලකොටුවේ පිවිසුම් දොරටුව අසල මෙම තෙරපීම ආරම්භ වී ඇති අතර, එම අවස්ථාවේ ඇදහැළුණු දැඩි වර්ෂාව හේතුවෙන් තත්ත්වය තවත් දරුණු වූ බව නිලධාරීහු පවසති.
හයිටි අග්රාමාත්ය ඇලික්ස් ඩිඩියර් ෆිල්ස්-ඒමේ (Alix Didier Fils-Aimé) ප්රකාශයක් නිකුත් කරමින් සඳහන් කළේ, තරුණ තරුණියන් විශාල වශයෙන් සහභාගී වූ උත්සවයකදී මෙම අවාසනාවන්ත සිදුවීම සිදුව ඇති බවයි. සිද්ධිය සම්බන්ධයෙන් විධිමත් පරීක්ෂණයක් ආරම්භ කර ඇති අතර පීඩාවට පත්වූවන්ට සහාය වීම සඳහා අදාළ සියලුම බලධාරීන් යොදවා ඇති බව ද ඔහු පැවසීය.
දරුණු කල්ලි ප්රචණ්ඩත්වයෙන් පීඩා විඳින හයිටි රාජ්යයට මෙවැනි ස්වභාවික ව්යසනයක් බඳු තත්ත්වයකට මුහුණ දීමට සිදුවීම මහත් කනගාටුවට කරුණක් බව දේශීය මාධ්ය පෙන්වා දෙයි.
ඓතිහාසික ලෆෙරියර් බලකොටුව
හයිටි රාජ්යයේ නිදහසේ අභිමානවත් සංකේතය ලෙස සැලකෙන ලෆෙරියර් බලකොටුව (Citadelle Laferrière), 19 වැනි සියවසේ මුල් භාගයේදී ප්රංශ යටත් විජිත පාලනයෙන් නිදහස ලැබීමෙන් පසු හෙන්රි ක්රිස්ටෝෆ් නායකයාගේ මඟපෙන්වීම යටතේ ඉදිකරන ලද්දකි. බටහිර අර්ධගෝලයේ පිහිටි විශාලතම බලකොටුවක් ලෙස සැලකෙන මෙය, මුහුදු මට්ටමේ සිට අඩි 3,000ක් පමණ උසැති කඳු මුදුනක පිහිටා ඇති අතර එය ප්රංශ ආක්රමණවලින් ආරක්ෂා වීම සඳහා වූ ප්රබල ආරක්ෂක පවුරක් ලෙස ක්රියා කළේය.
1982 වසරේදී යුනෙස්කෝ ලෝක උරුම අඩවියක් ලෙස ප්රකාශයට පත් කරන ලද මෙම ඓතිහාසික ස්මාරකය, වහල්භාවයෙන් මිදී ස්වෛරීභාවය දිනාගත් කළු ජාතිකයන්ගේ ශක්තිය හා වාස්තු විද්යාත්මක දක්ෂතාව ලොවටම කියාපාන “ලොව අටවැනි පුදුමය” ලෙස ද හයිටි වැසියන් අතර ගෞරවාදරයට පාත්ර වේ.
