මිනිස් ලේඛකයින්ගේ යුගය අවසන් වෙමින් පවතීද? බ්රිතාන්යයේ කේම්බ්රිජ් විශ්වවිද්යාලය (University of Cambridge) විසින් නිකුත් කරන ලද නවතම වාර්තාවකට අනුව ඊට පිළිතුර “ඔව්” විය හැකිය.
වෘත්තීය නවකතාකරුවන් 300කට අධික පිරිසක් යොදා ගනිමින් සිදු කළ සමීක්ෂණයකින් හෙළි වී ඇත්තේ, කෘතීම බුද්ධිය (AI) විසින් අනාගතයේදී තමාව සම්පූර්ණයෙන්ම ප්රතිස්ථාපනය (Replace) කරනු ඇතැයි ඔවුන්ගෙන් අඩක්ම (50%) විශ්වාස කරන බවයි.
ලේඛකයින් මෙලෙස කලබල වීමට ප්රධාන හේතු 3ක් මෙම අධ්යයනය මගින් පෙන්වා දෙයි:
ව්යාජ පොත් (Deepfake Books): තමන් විසින් ලියන ලදැයි පවසන පොත් Amazon වැනි වෙබ් අඩවි වල විකිණීමට ඇති බව ඇතැම් ලේඛකයින් සොයාගෙන ඇත. නමුත් ඇත්ත වශයෙන්ම ඒවා මුදල් ඉපැයීම සඳහා AI මගින් ලියන ලද බාල තත්ත්වයේ ව්යාජ පොත් ය
නිර්මාණ සොරා ගැනීම: තම අවසරයකින් තොරව, ChatGPT වැනි AI මාදිලි පුහුණු කිරීම (Train) සඳහා තම පොත් භාවිතා කර ඇති බව ලේඛකයින්ගෙන් 60%ක් විශ්වාස කරති. ඒ සඳහා ඔවුන්ට කිසිදු මුදලක් ගෙවා නොමැත.
දැනටමත් ආදායම් අහිමි වීම: මෙය අනාගතය පිළිබඳ ගැටළුවක් පමණක් නොවේ. බොහෝ සමාගම් දැන් මිනිසුන් බඳවා ගැනීම වෙනුවට නොමිලේ ඇති AI මෙවලම් භාවිතා කරන බැවින්, බොහෝ ලේඛකයින්ට තම අමතර ආදායම් මාර්ග (පිටපත් ලිවීම / Copywriting වැනි) අහිමි වී ඇත.
පර්යේෂකයින් පවසන්නේ ලේඛකයින් දැඩි අවිනිශ්චිත භාවයකින් පසුවන බවයි. අනාගතයේදී යම් කතාවක් ලියන්නේ මිනිසෙක්ද නැත්නම් රොබෝවෙක්ද යන්න පාඨකයින්ට වැදගත් නොවනු ඇතැයි ඔවුහු බිය වෙති.
මෙයට විසඳුමක් ලෙස කර්තෘ හිමිකම් නීති (Copyright Laws) වහාම යාවත්කාලීන කළ යුතු බව මෙම වාර්තාවෙන් යෝජනා කරයි. ඔවුන් පවසන්නේ, AI සමාගම් විසින් භාවිතා කරන දත්ත සඳහා ගෙවීමක් කිරීමට නව නීති නොගෙන ආවොත්, ‘ලේඛන කලාව’ වෘත්තියක් ලෙස අවසන් වනු ඇති බවයි.
කේම්බ්රිජ් විශ්වවිද්යාලයේ මහාචාර්ය ජිනා නෙෆ් පවසන්නේ “අපගේ නිර්මාණාත්මක කර්මාන්ත යනු රැකගත යුතු ජාතික සම්පත් වේ.”
