ස්විට්සර්ලන්තයේ ඇල්ප්ස් කඳුකරයේ පිහිටි ප්රසිද්ධ සංචාරක නගරයක් වන ක්රාන්ස්–මොන්ටානා හි සමාජ ශාලාවක නව වසර සැමරීමක් අතරතුර ඇති වූ දැඩි ගින්නකින් පුද්ගලයින් දහයක් පමණ මියගොස් ඇති බව පොලිසිය පවසයි. තවත් සීයකට අධික පිරිසක් බරපතළ තුවාල ලබා ඇත.
මෙම ගින්න සිදුව ඇත්තේ “ලෙ කොන්ස්ටලේෂන්” නමැති සමාජ ශාලාවේදී ය. පොලිසිය පවසන්නේ මියගිය ගණන තවමත් නිශ්චිත නොවන බවත්, මියගිය පුද්ගලයින් හඳුනාගැනීමේ කටයුතු සිදු වෙමින් පවතින බවත්ය.
ගින්න පැතිර ගියේ මිනිත්තු කිහිපයකින්
සිද්ධියට සාක්ෂි දුන් පිරිසක් කියා සිටියේ, බාර් එක තුළ දැල්වූ බෝතලයකින් ලීවලින් සාදා තිබූ සිවිලිමට ගිනි ගැනීමෙන් ගින්න ආරම්භ වූ බවයි. ගින්න ඉතා වේගයෙන් පැතිර ගොස් සිවිලිම කඩා වැටුණු බවද ඔවුන් සඳහන් කළා.
පහළ මහලෙන් පිටවීමට උත්සාහ කළ පිරිස කුඩා පඩිපෙළක් හරහා යාමට උත්සාහ කිරීමේදී දැඩි තදබදයක් ඇති වූ අතර, බොහෝ දෙනා එහිදී තුවාල ලැබූ බව වාර්තා වේ.
ගින්නෙන් බේරීමට උත්සාහ කළ කිහිප දෙනෙකු කවුළු බිඳ දමා පිටතට පැන ඇති බවද සාක්ෂිකරුවෝ පැවසූහ. දැඩි ලෙස තුවාල ලැබූ පුද්ගලයින් රැගෙන යාමට හෙලිකොප්ටර් සහ ගිලන් රථ රැසක් යොදාගෙන තිබුණි.
තුවාල ලැබූ පිරිස විශාල වීම හේතුවෙන් ප්රාදේශීය රෝහලේ දැඩි සත්කාර ඒකක ඉක්මනින්ම පිරී ගොස් ඇති බව බලධාරීහු කියා සිටියහ.
ගින්නට හේතුව තවමත් නොදනී
මෙම ගින්නට හේතුව මේ වන විටත් නිශ්චිතව අනාවරණය වී නැති අතර, එය කිසිදු ආකාරයක ප්රහාරයක් නොවන බව බලධාරීහු අවධාරණය කරති. විශේෂඥ කණ්ඩායම් විසින් විමර්ශන සිදු කරමින් පවතී.
සංචාරක නගරයකට දැඩි කම්පාවක්
ක්රාන්ස්–මොන්ටානා නගරය ස්විට්සර්ලන්තයේ ජනප්රියම සංචාරක නගරවලින් එකකි. නව වසර සැමරුමක් විපතක් බවට පත්වීම හේතුවෙන් මුළු නගරයම දැඩි කම්පාවට පත්ව ඇති බව වාර්තා වේ.
ස්විට්සර්ලන්ත ජනාධිපතිවරයාද මෙම සිද්ධිය සම්බන්ධයෙන් ශෝකය පළ කරමින්, විපතට පත් සියලුම පවුල්වලට සිය ශෝකී පණිවිඩය යොමු කර ඇත.
