බෙංගාල බොක්කේ ශ්රී ලංකාවට ගිනිකොණ දිග මුහුදු ප්රදේශයේ පවතින ගැඹුරු පීඩන අවපාතය හෙට (09) සවස 5.30ත් රාත්රී 11.30ත් අතර කාලයේ දී හම්බන්තොට සහ කල්මුණේ අතරින් ශ්රී ලංකා වෙරළ තීරයට ඇතුළුවීමට ඉඩ ඇති බව කාලගුණ විද්යා දෙපාර්තමේන්තුව නිවේදනය කරයි.
මෙම පද්ධතිය නිරිතදිග බෙංගාල බොක්ක හරහා බටහිරට බරව වයඹ දෙසට ගමන් කරමින් පවතින බව පුරෝකථනය කර ඇත.
මේ හේතුවෙන් කාලගුණවිද්යා දෙපාර්තමේන්තුව විසින් අනතුරු ඇඟවීමේ රතු නිවේදනයක් නිකුත් කර ඇති අතර නැගෙනහිර පළාතේ අම්පාර සහ මඩකලපුව යන දිස්ත්රික්කවල ඇතැම් ස්ථානවලට විටින් විට වැසි හෝ ගිඟුරුම් සහිත වැසි මෙන්ම ඇතැම් ස්ථානවලට මි.මී 150ට වැඩි ඉතා තද වැසි ඇති විය හැකි බවත් එම නිවේදනයේ දැක්වේ.
මුලතිව්, වව්නියාව, කිලිනොච්චි, පොළොන්නරුව සහ ත්රිකුණාමලයට විටින් වැසි හෝ ගිගුරුම් සහිත වැසි ඇති විය හැකි අතර ඇතැම් ස්ථානවලට මි.මී 100- 150ක පමණ තද වැසි ඇති විය හැකිය.
මේ අතර යාපනය, මන්නාරම මෙන්ම ඌව පළාතේ මොණරාගල සහ බදුල්ල යන දිස්ත්රික්කවලට සහ මධ්යම පළාතේ නුවරඑළිය සහ මාතලේ දිස්ත්රික්කවලටත් විටින් විට වැසි හෝ ගිඟුරුම් සහිත වැසි හෝ ඇතැම් ස්ථානවලට මි.මී 100ට වැඩි තද වැසි ඇති වේ.
නැවත දැනුම් දෙනතුරු දිවයින වටා ගැඹුරු සහ නොගැඹුරු මුහුදු ප්රදේශවල ධීවර සහ නාවික කටයුතුවලින් වැළකී සිටින ලෙස කාලගුණවිද්යා දෙපාර්තමේන්තුව ධීවර ප්රජාවගෙන් ඉල්ලා සිටියි.
දැනට මෙම මුහුදු ප්රදේශවල ධීවර කටයුතුවල යෙදී සිටින පිරිස වහාම ගොඩ බිමට හෝ ආරක්ෂිත ස්ථානයක් වෙත පැමිණෙන ලෙසටද කාලගුණවිද්යා දෙපාර්තමේන්තුව ඉල්ලීම් කර ඇත.
