මැතිවරණ පනත් හතරක පවතින දෝෂ සහ දුර්වලතා රැසක් නිවැරදි කිරීම සඳහා මැතිවරණ කොමිෂන් සභාව මේ දිනවල විශේෂ වැඩපිළිවෙළක් ආරම්භ කර ඇති බව එම කොමිසමේ සභාපති ආනන්ද රත්නායක මහතා පැවසීය. මේ සඳහාම විශේෂිත කමිටුවක් පත් කර ඇති අතර ජනාධිපතිවරණ, මහ මැතිවරණ, පළාත් සභා සහ පළාත් පාලන මැතිවරණ පනත් කෙටුම්පත්වල ඇති අඩුපාඩු මෙහිදී නිරීක්ෂණයට ලක් වේ.
මෙම සංශෝධන සිදු කිරීමෙන් අනතුරුව සියලුම පක්ෂ ලේකම්වරුන් සමඟ සාකච්ඡා කර, කැබිනට් මණ්ඩලයේ අනුමැතිය ලබාගෙන එම පනත් පාර්ලිමේන්තුවට ඉදිරිපත් කිරීමට බලාපොරොත්තු වන බව සභාපතිවරයා වැඩිදුරටත් සඳහන් කළේය.
පළාත් සභා මැතිවරණය සහ නීතිමය බාධා
වසර දහයකට වැඩි කාලයක් තිස්සේ පවත්වා නොමැති පළාත් සභා මැතිවරණය පැවැත්වීමට ඇති නීතිමය බාධා හඳුනා ගැනීම සඳහා පත් කර ඇති පාර්ලිමේන්තු විශේෂ කාරක සභාව ලබන 7 වැනිදා රැස්වීමට නියමිතය. අමාත්ය විජිත හේරත් මහතාගේ සභාපතිත්වයෙන් යුත් මෙම කාරක සභාව හමුවට මැතිවරණ කොමිෂන් සභාවේ සහ නීතිපති දෙපාර්තමේන්තුවේ ජ්යෙෂ්ඨ නිලධාරීන් පිරිසක් එදිනට කැඳවීමට තීරණය කර ඇත.
පළාත් සභා නවයම මේ වන විට ආණ්ඩුකාරවරුන්ගේ පාලනය යටතේ පවතින බැවින්, මෙම මැතිවරණය කඩිනමින් පැවැත්වීම පිළිබඳව කමිටුව තුළ දීර්ඝ ලෙස සාකච්ඡා වී තිබේ. එහිදී කමිටු සාමාජික මන්ත්රීවරුන් බහුතරයකගේ මතය වී ඇත්තේ, පැරණි සමානුපාතික ඡන්ද ක්රමය යටතේ හෝ කඩිනමින් මැතිවරණය පවත්වා, අනතුරුව පනතේ ඇති අනෙකුත් අඩුපාඩු නිවැරදි කරගත යුතු බවයි.
මෙම සාකච්ඡාව හරහා පළාත් සභා මැතිවරණය පැවැත්වීමට ඇති බාධා මගහරවා ගැනීම සඳහා වන නිර්දේශ ඉදිරිපත් කිරීමට අපේක්ෂිතය.
