යුක්රේනයේ කියෙව් නුවර නිවාස සංකීර්ණයක් ඉලක්ක කර ගනිමින් රුසියාව එල්ල කළ ප්රහාරයකින් සිවිල් වැසියන් 24 දෙනෙකු මියගොස් පැය කිහිපයකට පසු රුසියාව සහ යුක්රේනය අතර යුද සිරකරුවන් 205 දෙනෙකු හුවමාරු කරගත් බව දෙපාර්ශ්වයම තහවුරු කරයි.
කියෙව් නුවර නව මහල් නිවාස සංකීර්ණයක් ඉලක්ක කර රුසියාව එල්ල කළ රුසියානු X-101 කෲස් මිසයිල ප්රහාරයෙන් කුඩා දැරියන් තිදෙනෙකු ඇතුළු 24 දෙනෙකු ජීවිතක්ෂයට පත් විය. මියගිය පිරිස අතර 12 හැවිරිදි ලියුබාවා යාකොව්ලෙවා ද වේ. ඇයගේ පියා ද මීට පෙර යුද්ධයේදී මියගොස් තිබූ බව වාර්තා වේ.
සෙවුම් සහ මුදාගැනීමේ මෙහෙයුම් පැය 28ක් පුරා ක්රියාත්මක වූ අතර, සුන්බුන් අතරින් 30 දෙනෙකු බේරා ගැනීමට සහන කණ්ඩායම් සමත් විය. මෙම ඛේදවාචකය වෙනුවෙන් කියෙව් නුවර ශෝක දිනයක් ද ප්රකාශයට පත් කර තිබුණි.
යුක්රේන සිරකරුවන් නිදහස් වීම
ජනාධිපති සෙලෙන්ස්කි සඳහන් කළේ නිදහස් වූ බොහෝ යුක්රේන සිරකරුවන් 2022 වසරේ මාරියුපෝල් වටලෑමේදී සහ චර්නොබිල් බලාගාරය අසලදී රුසියානු භාරයට පත් වූවන් බවයි. එක්සත් ජනපදය සහ එක්සත් අරාබි එමීර් රාජ්යය මැදිහත් වී මෙම සිරකරුවන් හුවමාරුව සම්බන්ධීකරණය කර තිබේ. රුසියාව ද තමන් වෙත භාර දුන් සිරකරුවන් 205 දෙනෙකු බෙලරුස් වෙත රැගෙන ගිය බව තහවුරු කළේය.
රුසියාවට එල්ල වූ ඩ්රෝන ප්රහාරය
මේ අතර, මොස්කව් නුවරට ගිනිකොන දෙසින් පිහිටි රියාසාන් නගරයට යුක්රේනය එල්ල කළ ඩ්රෝන ප්රහාරයකින් කුඩා දරුවෙකු ඇතුළු හතර දෙනෙකු මියගොස් ඇති බව රුසියානු නිලධාරීහු පවසති. මෙම ප්රහාරයෙන් පුද්ගලයින් 28 දෙනෙකු තුවාල ලබා තිබේ. රුසියාවේ විශාලතම තෙල් පිරිපහදුවක් ඉලක්ක කර මෙම ප්රහාරය එල්ල කළ බව යුක්රේන ඩ්රෝන බලකාය ප්රකාශ කළේය.
ජනාධිපති සෙලෙන්ස්කි චෝදනා කළේ කියෙව් වෙත ප්රහාර එල්ල කිරීමට යොදාගත් මිසයිලය මෑත සතිවල නිෂ්පාදනය කරන ලද්දක් බවයි. ගෝලීය සම්බාධක පවතිද්දී පවා රුසියාව මිසයිල නිෂ්පාදනයට අවශ්ය උපාංග සහ තාක්ෂණය තවමත් ලබාගන්නා බව මින් පැහැදිලි වන බව ඔහු පෙන්වා දුන්නේය.
දෙපාර්ශ්වයම මැයි මස 9 සිට 11 දක්වා කෙටි සටන් විරාමයකට එකඟ වී සිටිය ද, එය අවසන් වීමත් සමඟ රුසියාව යුක්රේනය වෙත මෙතෙක් එල්ල කළ විශාලතම ඩ්රෝන ප්රහාර මාලාව දියත් කර තිබේ. පැය 24ක් තුළ රුසියානු ඩ්රෝන යානා 1,410ක් සහ මිසයිල 56ක් යුක්රේන නගර ඉලක්ක කර ඇති බව වාර්තා වේ.
