ගංවතුරෙන් යටවූ ගුහාවක සතියක් සිරවී සිටි පස්දෙනෙකු බේරාගනී

ලාඕස් රාජ්‍යයේ මධ්‍යම ප්‍රදේශයේ, ගංවතුරෙන් යටවූ පටු ගුහාවක් තුළ සතියක කාලයක් තිස්සේ සිරවී සිටි ගම්වැසියන් පස් දෙනෙකු නිරුපද්‍රිතව බේරා ගැනීමට ලාඕස් සහ තායිලන්ත ඒකාබද්ධ මුදාගැනීමේ කණ්ඩායම් සමත්ව තිබේ. කෙසේ වෙතත්, ඔවුන් සමඟ ගුහාවේ සිරවී සිටි ගම්වැසියන් දෙදෙනෙකු තවමත් අතුරුදන්ව ඇති බව මුදාගැනීමේ කණ්ඩායම් පවසයි.

ලාඕස් හි සයිසොම්බෝන් (Xaysomboun) පළාතේ පදිංචි මෙම හත් දෙනෙකුගෙන් යුත් කණ්ඩායම පසුගිය බදාදා (20) රන් නිධි සහ වන සතුන් සෙවීම සඳහා අගනුවර වන වියන්ටියන් සිට කිලෝමීටර් 120 ක් පමණ උතුරින් පිහිටි මෙම අතහැර දමා ඇති රන් පතලක් බඳු ගුහා සංකීර්ණයට ඇතුළු වී ඇත. නමුත් එම ප්‍රදේශයට ඇද හැළුණු අධික වර්ෂාව සහ නායයෑම් හේතුවෙන් ගුහාවේ දොරටුව අවහිර වීම නිසා ඔවුන්ට ආපසු පැමිණීමට නොහැකිව එහි සිරවී තිබේ.

අතිශය දුෂ්කර සහ බිහිසුණු මුදාගැනීමේ මෙහෙයුම

මුදාගැනීමේ කණ්ඩායම් විසින් සමාජ මාධ්‍ය වෙත මුදාහැර තිබූ දර්ශනවලට අනුව, ගලවාගැනීමේ කිමිදුම්කරුවන්ට මුළුමනින්ම පාහේ ජලයෙන් යටවූ, මඩ සහිත පටු මාර්ග ඔස්සේ ඉතා අපහසුවෙන් බඩගාමින් ඉදිරියට යාමට සිදුව ඇත. මෙම ගුහා සංකීර්ණයේ ඇතැම් ස්ථාන සෙන්ටිමීටර 50 ක් (අඟල් 20 ක්) තරම් අතිශය පටු ස්වභාවයක් ගන්නා බව සහන සේවකයෝ පවසති.

මෙහෙයුමට සම්බන්ධ වූ ෆින්ලන්ත ජාතික විශේෂඥ කිමිදුම්කරුවෙකු වන මිකෝ පාසි (Mikko Paasi) ප්‍රකාශ කළේ, සහන කණ්ඩායම්වලට ගුහාව තුළ මීටර් සිය ගණනක දුරක් නිරන්තර බාධක, ගංවතුර, නායයෑම් අවදානම සහ දූෂිත වායු තත්ත්වයන් මැද ගමන් කිරීමට සිදු වූ බවයි. මෙම පිරිස ගුහාවේ පිටවීම් දොරටුවේ සිට මීටර් 300 ක් පමණ ගැඹුරින් සිරවී සිට ඇති බවට ඔහු ඇස්තමේන්තු කර තිබුණි.

තායිලන්ත සහන සේවකයෙකු වන කෙන්කාච් බන්ගාවොන්ග් (Kengkach Bangkawong) ෆේස්බුක් සටහනක් තබමින් කියා සිටියේ, සිරවී සිටි පිරිසෙන් පස් දෙනෙකු ජීවතුන් අතර සිටියදී සොයාගත් බවයි.

අතුරුදන් වූවන් සෙවීම අඛණ්ඩව

ලාඕස් හි ‘Rescue Volunteer for People’ සංවිධානයේ බුන්කාම් ලුඇන්ග්ලත් (Bounkham Luanglath) මාධ්‍ය වෙත හඬ පණිවිඩයක් නිකුත් කරමින් කියා සිටියේ, තමන් තවමත් මෙම බිහිසුණු අත්දැකීමෙන් කම්පනයට පත්ව සිටින නමුත්, තම කණ්ඩායම එම අපහසු කාර්යය සාර්ථක කරගත් බවයි. ඉතිරි අතුරුදන් වූ පුද්ගලයන් දෙදෙනා සොයා මෙහෙයුම් අඛණ්ඩව ක්‍රියාත්මක කරන බවද ඔහු අවධාරණය කළේය.

දේශීය සහන සේවකයෙකු වන බැන්ග් (Baeng) ප්‍රකාශ කළේ, මෙම ප්‍රදේශය කිසිවෙකුට අයිති නැති එකක් වන අතර ප්‍රදේශවාසීන් සාමාන්‍යයෙන් ආහාර සෙවීම සහ වළවල් හෑරීම සඳහා එහි යන එන බවයි.

2018 තායිලන්ත ගුහා මෙහෙයුමේ මතකයන්

විශේෂත්වය වන්නේ, මෙම මෙහෙයුමට දායක වූ තායි සහන සේවක කෙන්කාච්, මීට පෙර 2018 වසරේදී තායිලන්තයේ චියැං රායි පළාතේ ගංවතුරෙන් යටවූ ගුහාවක සති දෙකක් සිරවී සිටි කුඩා පිරිමි ළමුන් 12 දෙනා සහ ඔවුන්ගේ පාපන්දු පුහුණුකරු බේරාගැනීමේ ලෝක ප්‍රකට සුවිශේෂී මෙහෙයුමට ද දායක වූ අයෙකු වීමයි. එදා ලොව පුරා විශේෂඥයන් 10,000 කට අධික පිරිසකගේ දායකත්වයෙන් සිදු වූ එම මෙහෙයුම ඇසුරින් ‘Thirteen Lives’ සහ ‘The Rescue’ වැනි ලෝක ප්‍රසිද්ධ සිනමාපට සහ වාර්තා චිත්‍රපට පවා නිර්මාණය විය.