ලෝකයේ මෙතෙක් කුරුලු උණෙන් තොරව පැවති එකම මහාද්වීපය වූ ඔස්ට්රේලියාවෙන් ද ප්රථම වතාවට ‘H5N1’ කුරුලු උණ වෛරස් ප්රභේදය ආසාදනය වූ පක්ෂියෙකු සොයාගෙන තිබේ. ඒ අනුව, මෙම බෝවන සුලු දරුණු වෛරසය දැන් පෘථිවියේ සෑම මහාද්වීපයකටම ව්යාප්ත වී ඇතැයි ඔස්ට්රේලියානු බලධාරීහු නිල වශයෙන් තහවුරු කළහ.
ඔස්ට්රේලියානු කෘෂිකර්ම අමාත්ය ජූලි කොලින්ස් (Julie Collins) ප්රකාශ කළේ, බටහිර ඔස්ට්රේලියාවේ දුරස්ථ ප්රදේශයකින් හමුවූ ‘බ්රවුන් ස්කුවා’ (Brown Skua) නැමැති සංක්රමණික මුහුදු පක්ෂියෙකුගේ සිරුරෙන් මෙම වෛරසය හඳුනාගත් බවයි. පර්ත් (Perth) නුවරට ගිනිකොණදෙසින් පිහිටි ජාතික උද්යානයක වෙරළ තීරයක සිටියදී මෙම පක්ෂියා සොයාගෙන ඇත.
“අපට සදාකාලිකවම කුරුලු උණෙන් බේරී සිටින්න බැරි බව අපි කවුරුත් දැන සිටියා” යැයි අමාත්යවරිය මාධ්ය හමුවකදී සඳහන් කළාය. මීට අමතරව තවත් සංක්රමණික පක්ෂියෙකු ද අසනීප තත්ත්වයෙන් එම වෙරළෙන්ම හමුවී ඇති නමුත් සතුන් සමූහ වශයෙන් මියයෑමේ තත්ත්වයක් මෙතෙක් වාර්තා වී නොමැති බවද ඇය පැවසුවාය.
මෙම වෛරස් ප්රභේදය ඔස්ට්රේලියානු මහාද්වීපයෙන් ප්රථම වරට හමුවුවද, ඉන්දීය සාගරයේ පිහිටි ඔස්ට්රේලියාවට අයත් දුරස්ථ බාහිර දූපත් කිහිපයකින් (Heard and McDonald Islands) පසුගිය වසරේ ඔක්තෝබර් මාසයේදී ද ආසාදිත පක්ෂීන් වාර්තා වී තිබුණි.
මේ සතියේ ප්රකාශයට පත් කරන ලද නවතම අධ්යයනයකට අනුව, පසුගිය අගෝස්තු මාසයේ සිට එම දූපත්වල සිටි පැටවුන් 17,000කගෙන් යුත් සීල් සතුන් (Baby Seals) කණ්ඩායමක 13,000ක්ම, එනම් 75%කට වඩා වැඩි ප්රමාණයක් මෙම H5N1 වෛරසය හේතුවෙන් මියගොස් තිබේ. එමෙන්ම එහි වෙසෙන පෙන්ගුවින් සතුන් ද අසාමාන්ය ලෙස මියගොස් ඇති බව විද්යාඥයෝ පවසති. ප්රංශයට අයත් දූපත්වල සිට කිලෝමීටර් 1,800ක් දුර ගෙවා පැමිණි සංක්රමණික පක්ෂීන් හරහා මෙම වෛරසය එම දූපත් වෙත පැමිණෙන්නට ඇතැයි විශ්වාස කෙරේ.
1990 දශකයේ අගභාගයේදී චීනයෙන් ප්රථම වරට මතු වූ H5N1 වෛරසය, වනජීවී පක්ෂීන් සහ ගෘහස්ථ පාලන පක්ෂීන් (කුකුළන් වැනි) අතර ඉතා වේගයෙන් ව්යාප්ත විය හැකිය. කෙසේවුවද සතුන්ගෙන් මිනිසුන්ට වෛරසය වැළඳීමේ අවස්ථාවන් පවතින්නේ අතිශය දුර්ලභ මට්ටමකය.
ඔස්ට්රේලියාවේ ප්රධාන පශු වෛද්ය නිලධාරිනී බෙත් කුක්සන් (Beth Cookson) ප්රකාශ කළේ, මෙවැනි තත්ත්වයකට මුහුණ දීම සඳහා එරට බලධාරීන් දිගු කලක සිට සූදානමින් සිටි බවත්, සත්ව රෝග හදිසි කමිටුව අද (20) දිනයේම රැස්වී ඉදිරි ආරක්ෂිත පියවර පිළිබඳව සාකච්ඡා කළ බවත්ය. වෛරසය අනෙකුත් සත්ව ගහණයන් වෙත පැතිරී ඇත්දැයි ඉදිරි දින කිහිපය තුළ නිරීක්ෂණය කරන බවද එරට වනජීවී බලධාරීහු පවසති.
