අධිකරණ සේවාවන්හි නිරත වන විනිසුරුවරුන්ගේ ධූර කාලය (විශ්රාම වයස) දීර්ඝ කිරීම පිළිබඳව සමාජය තුළ දැඩි කතාබහක් නිර්මාණය වී ඇති පසුබිමක, ශ්රී ලංකා අධිකරණ සේවා සංගමයේ සභාපති, කොටුව මහේස්ත්රාත් පසන් අමරසේන මහතා වහාම ක්රියාත්මක වන පරිදි සිය ධූරයෙන් ඉල්ලා අස්වී ඇති බව වාර්තා වේ.
ඊයේ (11) පෙරවරුවේ කඩුවෙල අධිකරණ සංකීර්ණයේදී පැවැත්වීමට නියමිතව තිබූ විශේෂ මහා සභා රැස්වීමට සුළු මොහොතකට පෙර සභාපතිවරයා මෙම තීරණය ගෙන තිබේ.
සිය ඉල්ලා අස්වීම නිවේදනය කරමින් පසන් අමරසේන මහතා විසින් සාමාජිකත්වය වෙත යොමු කරන ලද ලිපියක දැක්වෙන්නේ, සංගමයේ විධායක කමිටුව විසින් කැඳවා තිබූ මෙම විශේෂ මහා සභා රැස්වීම සම්ප්රදායෙන් බැහැර වූවක් මෙන්ම නීත්යානුකූල නොවන එකක් බවයි.
පිළිගත් සම්ප්රදාය අනුව මෙවැනි රැස්වීමක් පැවැත්වීමට පෙර අධිකරණ සේවා කොමිෂන් සභාවේ එකඟතාවය ලබාගත යුතු වුවද, විධායක කමිටුව එය පැහැර හැර ඇති බව ඔහු චෝදනා කරයි. එමෙන්ම විශේෂ මහා සභා රැස්වීමක් පැවැත්වීමට අවශ්ය වන සමස්ත සාමාජිකත්වයෙන් $\frac{1}{3}$ ක සහභාගීත්වය (සාමාජිකයන් 46 දෙනෙකු පමණක් සහභාගීත්වය තහවුරු කර තිබීම හේතුවෙන්) තහවුරු වී නොමැති බවද ඔහු පෙන්වා දෙයි.
“විනිසුරුවරුන්ගේ විශ්රාම වයස දීර්ඝ කිරීමට සංගමය එරෙහි බවට යෝජනාවක් සම්මත කර, එය මාධ්ය මඟින් ප්රචාරය කරමින් සමහර දේශපාලන උවමනාවන්ට සහාය දැක්වීමේ කණගාටුදායක සහ නිර්ලජ්ජිත උත්සාහයක සංගමයේ ලේකම්වරයා ඇතුළු පිරිසක් නිරත වනවා. කිසිදු විශ්වාසයක් තැබිය නොහැකි විධායක කමිටුවකට තවදුරටත් නායකත්වය සැපයීමට මා හට අවශ්යතාවයක් නැහැ,” යැයි සභාපතිවරයා සිය ලිපියේ සඳහන් කර තිබේ.
කෙසේ වෙතත්, සභාපතිවරයා එල්ල කළ සියලු චෝදනා ප්රතික්ෂේප කරමින් අධිකරණ සේවා සංගමයේ ලේකම්, විනිසුරු සුරංග මුණසිංහ මහතා විසින්ද ලිපියක් නිකුත් කර ඇති අතර, සැලසුම් කළ පරිදි මහා සභා රැස්වීම පවත්වන බව එහි දන්වා තිබුණි.
සභාපතිවරයාගේ ඉල්ලා අස්වීම සහ විරෝධය මධ්යයේ වුවද, අධිකරණ සේවා සංගමයේ මහසභා රැස්වීම අද පෙරවරුවේ කඩුවෙල අධිකරණ සංකීර්ණයේදී සාර්ථකව පවත්වා තිබේ.
සාමාජිකයන් 65 දෙනෙකුගේ සහභාගීත්වයෙන් පැවැත්වුණු මෙම රැස්වීමේදී, විනිසුරුවරුන්ගේ ධූර කාලය දීර්ඝ කිරීමට රජය ගෙන ඇති යෝජනාවට එරෙහිව පැමිණ සිටි සියලුම සාමාජිකයින් ඒකමතිකව සිය ඡන්දය ප්රකාශ කරමින් එම යෝජනාව පරාජයට පත් කර ඇති බව වාර්තා වේ.
