දරුවන්ට ලබාදුන් ආහාරවලට ඊයම් අඩංගු විෂ සහිත වර්ණක මිශ්‍ර කිරීමේ සිද්ධියක් සම්බන්ධයෙන් චෝදනා ලැබූ චීනයේ ළදරු පාසලක හිමිකාරියකට ජීවිතාන්තය දක්වා සිරදඬුවම් නියම වී තිබේ.
මෙලෙස ජීවිතාන්තය දක්වා සිරදඬුවම් නියම වූයේ ගන්සු පළාතේ ‘හෙෂි පෙයිෂින්’ ළදරු පාසලේ හිමිකාරිය වන ලී හුයිෆැන්ග්ට ය. ඊට අමතරව ඇයගේ යුවාන් 500,000ක වත්කම් රාජසන්තක කිරීමට ද අධිකරණය නියෝග කර ඇත.
මෙම සිද්ධියට අදාළව පාසලේ විදුහල්පතිනියට වසර 15ක සිරදඬුවමක් සහ යුවාන් 300,000ක දඩයක් නියම වී ඇති අතර, මුළුතැන්ගෙයි සේවකයන් සිව්දෙනෙකුට වසර 6 සිට 8 දක්වා සිරදඬුවම් නියම කර තිබේ.
ආහාරවල පෙනුම වඩාත් ආකර්ෂණීය කර දරුවන් සහ දෙමාපියන් වසඟ කරගැනීමේ අරමුණින්, හිමිකාරියගේ සහ විදුහල්පතිනියගේ උපදෙස් මත සේවකයන් විසින් මෙලෙස ආහාරවලට විෂ සහිත තීන්ත වර්ග මිශ්‍ර කර ඇත.
ඔවුන් පිළියෙල කළ රතු ඉඳි කේක් සහ ඉරිඟු බනිස්වල, චීනයේ නීතිමය සීමාවට වඩා දහස් ගුණයකින් වැඩි විෂ සහිත ඊයම් අඩංගු වී තිබූ බව පරීක්ෂණවලදී හෙළි විය.
2025 ජූලි මාසයේදී සිදුකළ වෛද්‍ය පරීක්ෂණවලදී මෙම පාසලේ දරුවන් 200කට වැඩි පිරිසකගේ සහ සේවකයන් 20කගේ රුධිරයේ ඊයම් මට්ටම අසාමාන්‍ය ලෙස ඉහළ ගොස් ඇති බව අනාවරණය විය.
ලෝක සෞඛ්‍ය සංවිධානයට අනුව, මෙලෙස කුඩා දරුවන්ට ඊයම් විෂ වීමෙන් මොළයට සහ මධ්‍යම ස්නායු පද්ධතියට බරපතළ හානි සිදුවිය හැකිය.
මෙම සිද්ධියෙන් පසු, සිද්ධියට සම්බන්ධ රෝහල් සහ නිලධාරීන් පිළිබඳව ද පරීක්ෂණ ආරම්භ කර ඇති අතර, සමස්ත චීනය පුරාම පාසල් ආහාර සුරක්ෂිතතාව සඳහා නව තද නීති සහ මාර්ගෝපදේශ හඳුන්වා දීමට පියවර ගෙන තිබේ.
