ප්‍රශ්න පත්‍ර පිටවීමක් නිසා ඉන්දියාවේ වෛද්‍ය සිහිනය බොඳවෙයි

ඉන්දියාවේ වෛද්‍ය විද්‍යාල ප්‍රවේශය සඳහා පවත්වනු ලබන ජාතික සුදුසුකම් සහ ප්‍රවේශ විභාගය (NEET-UG) ප්‍රශ්න පත්‍ර පිටවීමක් පිළිබඳ චෝදනා හේතුවෙන් අවලංගු කිරීමට ඉන්දීය බලධාරීන් පියවර ගෙන තිබේ. මෙම තීරණයත් සමඟ විභාගයට පෙනී සිටි සිසුන් මිලියන 2.28කට ආසන්න පිරිසක් දැඩි අර්බුදයකට මුහුණ දී සිටිති.

මෙවර NEET-UG විභාගය පසුගිය මැයි 03 වැනිදා ඉන්දියාව පුරා මධ්‍යස්ථාන 5000කට අධික සංඛ්‍යාවකදී පැවැත්විණි. විභාගයට පෙනී සිටි සිසුන් සංඛ්‍යාව ලක්ෂ 22කට අධිකය. විභාගයෙන් දින කිහිපයකට පසු, විභාගයට පෙර ප්‍රශ්න පත්‍රය කාන්දු වී ඇති බවට තොරතුරු අනාවරණය විය. මෙම චෝදනාව ඉන්දියාව පුරා සිසුන්, දෙමාපියන් සහ දේශපාලන පක්ෂ අතර දැඩි ආන්දෝලනයක් ඇති කළේය.

විභාගය සංවිධානය කරන ජාතික පරීක්ෂණ ආයතනය (NTA) ප්‍රකාශ කළේ, සිදුකළ විමර්ශන සහ පවතින සාක්ෂි මත පදනම්ව මෙම විභාග ක්‍රියාවලිය තවදුරටත් පිළිගත නොහැකි බවට තීරණය කළ බවයි. “ශිෂ්‍යයන්ගේ අනාගතය සහ ජාතික විභාග පද්ධතිය පිළිබඳ විශ්වාසය ආරක්ෂා කිරීම සඳහා මෙම දැඩි තීරණය ගැනීමට සිදු වුණා,” යනුවෙන් NTA ආයතනය නිවේදනය කළේය.

නැවත විභාගය පැවැත්වෙන දිනය මෙතෙක් ප්‍රකාශයට පත් කර නොමැති අතර, ඒ හේතුවෙන් වෛද්‍ය විද්‍යාල ප්‍රවේශ කාලසටහන් ප්‍රමාද වීම පිළිබඳව සිසුන් අතර දැඩි අවිනිශ්චිතතාවයක් සහ කනස්සල්ලක් පවතී.

මෙම විභාගය සඳහා වසර ගණනාවක් පුරා දැඩි කැපවීමකින් සහ මහන්සියකින් සූදානම් වූ සිසුන්ට මෙම තීරණය දැඩි මානසික පීඩනයක් ඇති කර තිබේ. දිල්ලි නුවර 17 හැවිරිදි සිසුවියක කඳුළු අතරින් මාධ්‍ය වෙත පවසා ඇත්තේ, “මම මගේ ජීවිතයේ අවුරුදු දෙකක් NEET විභාගයට සූදානම් වීමට කැප කළා. පවුලේ උත්සව, මිතුරන් සමඟ කාලය ගත කිරීම හැමදේම මගහැරුණා. දැන් විභාගයම අවලංගු වෙලා,” යනුවෙනි. ඉන්දියාවේ බොහෝ සිසුන් මිල අධික පෞද්ගලික පුහුණු පන්තිවලට සහභාගී වෙමින්, සතියේ දිනවල පැය 4ක් සහ සති අන්තවල පැය 8-9ක් දක්වා වෙහෙස මහන්සි වී ඉගෙනුම ලබති.

ඉන්දීය මාධ්‍ය වාර්තා අනුව, ප්‍රශ්න පත්‍ර කාන්දුවේ මූලිකත්වය රාජස්ථාන් ප්‍රාන්තයෙන් ආරම්භ වී ඇති බවට සැක පළ වෙයි. රාජස්ථාන් පොලිසිය පවසන්නේ, “guess paper” ලෙස හඳුන්වන පුරෝකථන ප්‍රශ්න පත්‍රයක් විභාගයට පෙර සංසරණය වී ඇති බවයි. මෙම “guess paper” එකේ තිබූ ප්‍රශ්න 410ක් අතරින් රසායන විද්‍යා අංශයේ ප්‍රශ්න 120කට ආසන්න ප්‍රමාණයක් සැබෑ විභාගයට සමාන වූ බවට විමර්ශකයන් සැක පළ කරයි. NEET විභාගයේ ප්‍රශ්න පත්‍ර කට්ටල හතරක් පවතින අතර, එක් කට්ටලයක භෞතික විද්‍යාව, රසායන විද්‍යාව සහ ජීව විද්‍යාව යන අංශයන්ට අදාළ අනිවාර්ය ප්‍රශ්න 180ක් ඇතුළත් වේ. මෙම සිද්ධිය පිළිබඳ පරීක්ෂණ දැන් ඉන්දියාවේ මධ්‍යම විමර්ශන කාර්යාංශය (CBI) වෙත භාරදී තිබේ.

විපක්ෂයෙන් දැඩි චෝදනා

විභාගය අවලංගු කිරීමත් සමඟ ඉන්දීය විපක්ෂ දේශපාලන පක්ෂ රජයට දැඩි චෝදනා එල්ල කර තිබේ. කොංග්‍රස් පක්ෂ නායක රාහුල් ගාන්ධි ප්‍රකාශ කළේ, “සිසුන්ගේ කැපවීම, බලාපොරොත්තු සහ සිහින දූෂිත පාලන ක්‍රමයක් විසින් විනාශ කර තිබෙනවා” යනුවෙනි. ආම් ආද්මි පක්ෂ නායක අර්වින්ද් කේජ්‍රිවාල් ප්‍රකාශ කළේ, “දේශපාලන ආරක්ෂාව යටතේ ක්‍රියාත්මක වන ප්‍රශ්න පත්‍ර කාන්දු ජාලයන් තරුණයන්ගේ විශ්වාසය බිඳ දමනවා” යනුවෙනි.

විරෝධතා උණුසුම් වෙයි

කොංග්‍රස් පක්ෂයට අනුබද්ධ ශිෂ්‍ය සංවිධානයක් වන NSUI සංවිධානය දිල්ලියේ විරෝධතා සංවිධානය කර ඇති අතර, එහිදී සිසුන් පොලිස් බාධක මතින් නැගී විරෝධතා දක්වන දර්ශන සමාජ මාධ්‍ය තුළ ව්‍යාප්ත වී තිබේ. NSUI සභාපති විනෝද් ජාකර් මාධ්‍ය වෙත ප්‍රකාශ කළේ, “අධික කැපවීමකින් සහ අවංකභාවයෙන් සූදානම් වූ සිසුන්ගේ අනාගතය විකිණී අවසන්” බවයි. ඔහු ඇතුළු විරෝධතාකරුවන් රැසක් ඉන්දීය අධ්‍යාපන අමාත්‍ය ධර්මේන්ද්‍ර ප්‍රධාන්ගේ ඉල්ලා අස්වීමද ඉල්ලා තිබේ.

මෙය NEET විභාගය සම්බන්ධයෙන් මතුවූ පළමු ආන්දෝලනය නොවේ. 2024 වසරේදීද ප්‍රශ්න පත්‍ර පිටවීම, වංචා සහ අසාමාන්‍ය ලකුණු ප්‍රදානය කිරීම පිළිබඳ චෝදනා හේතුවෙන් රට පුරා විරෝධතා මතුව තිබිණි. අඛණ්ඩව මතුවන මෙවැනි සිදුවීම් හේතුවෙන් ඉන්දියාවේ ජාතික විභාග පද්ධතිය පිළිබඳ මහජන විශ්වාසය බරපතළ අභියෝගයකට මුහුණ දී ඇති බව විචාරකයෝ පෙන්වා දෙති.