ඕස්ට්රේලියාවේ බ්රිස්බේන් නුවර සිට හොංකොං බලා පියාසර කරමින් තිබූ කැතේ පැසිෆික් (Cathay Pacific) ගුවන් සේවයට අයත් මගී ප්රවාහන ගුවන් යානයක්, අහස් කුස තුළදී හදිසියේම දරුණු වායු කැළඹීමකට (Severe Turbulence) ලක්වී එකවරම උස ප්රමාණය (Altitude) පහත වැටීම හේතුවෙන් පුද්ගලයන් 10 දෙනෙකු තුවාල ලබා ඇති බව විදේශ මාධ්ය වාර්තා කරයි.
හොංකොං හි ප්රමුඛ පුවත්පතක් වන ‘සවුත් චයිනා මෝනිං පෝස්ට්’ (South China Morning Post) වාර්තාවලට අනුව, මෙම අනතුරට මුහුණ දී ඇත්තේ කැතේ පැසිෆික් ගුවන් සේවයට අයත් CX-156 දරන ගුවන් යානයයි. යානය හොංකොං වෙත ගොඩබැස්වීමට පැය දෙකකට පමණ පෙර, ගුවන් යානා කාර්ය මණ්ඩලය විසින් මගීන්ට ආහාර පාන සපයමින් සිටි අවස්ථාවකදී මෙම අවාසනාවන්ත සිදුවීමට මුහුණ දීමට සිදුව ඇත.
යානය වේගයෙන් සෙලවෙද්දී බඩු බාහිරාදිය ගුවනට විසිවෙයි
ගුවන් සමාගම නිවේදනයක් නිකුත් කරමින් පවසන්නේ, යානය එකවරම පහළට ඇදී යාමත් සමඟ සිදුවූ දැඩි සෙලවීම හේතුවෙන් ගුවන් යානා කාර්ය මණ්ඩලයේ සාමාජිකයන් හය දෙනෙකු (6) සහ මගීන් සිව්දෙනෙකු (4) තුවාල ලබා ඇති බවයි.
අනතුරට මුහුණ දුන් මගීන් පවසන්නේ එම අවස්ථාවේදී යානය තුළ දැඩි නොසන්සුන්කාරී වාතාවරණයක් හටගත් බවයි. තත්පර කිහිපයක් පුරා පැවති මෙම දරුණු සෙලවීමත් සමඟ යානය තුළ තිබූ අගුළු නොදැමූ විවිධ උපකරණ සහ බඩු බාහිරාදිය මගීන්ගේ ඇඟ මතින් ගුවන් යානය පුරා විසිවී ගිය බව ඔවුහු විස්තර කළහ.
අට දෙනෙකු රෝහල්ගත කෙරේ
යානය ආරක්ෂිතව හොංකොං ජාත්යන්තර ගුවන් තොටුපළ වෙත ගොඩබැස්වීමෙන් අනතුරුව, සූදානම් කර තිබූ වෛද්ය කණ්ඩායම් විසින් තුවාල ලැබූ මගීන් සහ කාර්ය මණ්ඩලය වහාම වෛද්ය පරීක්ෂණ සඳහා යොමු කරන ලදී. එහිදී සුළු තුවාල ලැබූ දෙදෙනෙකු හැර සෙසු අට දෙනාම වැඩිදුර ප්රතිකාර සඳහා කඩිනමින් රෝහල් වෙත ඇතුළත් කිරීමට පියවර ගෙන තිබේ.
පසුගිය කාල වකවානුව පුරාම ජාත්යන්තර ගුවන් ගමන්වලදී මෙවැනි දරුණු වායු කැළඹීම් (Turbulence) බහුලව වාර්තා වෙමින් පවතී. ගෝලීය දේශගුණික විපර්යාස, අස්ථායී කාලගුණික තත්ත්වයන් සහ වායුගෝලීය රටාවන්ගේ වෙනස්වීම් හේතුවෙන්, විශේෂයෙන්ම දිගුකාලීන ජාත්යන්තර ගුවන් මාර්ගවල (Long-haul routes) ගමන් ගන්නා සිවිල් ගුවන් යානාවලට ඉදිරියේදී එල්ල විය හැකි මෙවැනි අවදානම් තත්ත්වයන් පිළිබඳව ගුවන් සේවා විශේෂඥයෝ මේ වන විට දැඩි අවධානයක් යොමු කරමින් සිටිති.
