2019 අප්රේල් 21 වන දින ශ්රී ලංකාව කම්පනයට පත් කළ පාස්කු ඉරිදා මරාගෙන මැරෙන බෝම්බ ප්රහාර සම්බන්ධයෙන් සිදුවන විමර්ශනවලට නව මානයක් එක් කරමින් මහජන ආරක්ෂක අමාත්ය අනන්ද විජේපාල අද (10) පාර්ලිමේන්තුවේදී බරපතළ කරුණු රැසක් අනාවරණය කළේය.
අමාත්යවරයා ප්රකාශ කළේ, හිටපු හමුදා බුද්ධි අධ්යක්ෂවරයෙකු සහ පසුව රාජ්ය බුද්ධි සේවයේ ප්රධානියා ලෙස කටයුතු කළ විශ්රාමික මේජර් ජෙනරාල් සුරේෂ් සලේ පාස්කු ප්රහාරයට පෙර සහ පසු සිදුවූ ක්රියාකාරකම් සම්බන්ධයෙන් සෘජු හෝ වක්ර සම්බන්ධතාවයක් පැවති බවට සැක කිරීමට ප්රමාණවත් හා විශ්වාසදායක සාක්ෂි විමර්ශන අංශ සතුව පවතින බවයි.
අමාත්යවරයාට අනුව, ප්රහාරයට සති තුනකට පමණ පෙර මීගමුව ප්රදේශයේ කතෝලික දේවස්ථානවලට පැමිණෙන බැතිමතුන් සංඛ්යාව ඇතුළු සංවේදී තොරතුරු රැස් කිරීම සඳහා මුස්ලිම් පුද්ගලයින් සිව්දෙනෙකු යොදවා තිබේ. මෙම මෙහෙයුම සුරේෂ් සලේගේ මඟපෙන්වීම යටතේ සිදුකර ඇති බවට විමර්ශකයින් සැක පළ කරන බව අමාත්යවරයා සඳහන් කළේය.
මෙම පුද්ගලයින් අතරින් එක් අයෙකු අපරාධ පරීක්ෂණ දෙපාර්තමේන්තුව සතුව තිබූ ඉස්ලාමීය අන්තවාදීන්ගේ ඡායාරූප අතරින් හඳුනාගෙන ඇති අතර, ඔහු ISIS දෘෂ්ටිවාදයට සම්බන්ධ අයෙකු බවත් පාස්කු ප්රහාරයෙන් පසුව අතුරුදන් වී ඇති බවත් හෙළි වී ඇත.
එමෙන්ම ජාතික තව්හීද් ජමාත් (NTJ) සංවිධානය සහ එහි නායක සහරාන් හෂීම් විසින් එල්ල කළ හැකි ප්රහාරයක් පිළිබඳව පානදුර ප්රදේශයේ තොරතුරු සපයන්නෙකු විසින් හමුදා බුද්ධි අංශ වෙත කල්තියා අනතුරු අඟවා තිබූ බවද අමාත්යවරයා අනාවරණය කළේය.
“රෑමි” නමින් හඳුන්වන මෙම තොරතුරු සපයන්නා ප්රහාරයට පෙර අවදානම පිළිබඳව දැනුම් දී තිබුණද එම බුද්ධි තොරතුරු ඉහළ මට්ටම්වලට නිසි ලෙස යොමු නොවීම හේතුවෙන් ප්රහාර වළක්වා ගැනීමේ අවස්ථාව අහිමි වූ බව අමාත්යවරයා පැවසීය.
අනතුරු ඇඟවීම ලබාදීමෙන් අනතුරුව රෑමි නීතිවිරෝධී ලෙස රඳවා තබාගෙන ඇති බවත්, පසුව නිදහස් කිරීමෙන් පසු ඔහු කොළඹ ගලදාරි හෝටලයට කැඳවා සුරේෂ් සලේ මහතා සමඟ සාකච්ඡාවක් පවත්වා ඇති බවත් අමාත්යවරයා ප්රකාශ කළේය. එහිදී සිදුවූ සිදුවීම් සම්බන්ධයෙන් සලේ මහතා ඔහුගෙන් සමාව ඉල්ලා ඇති බවද එම තොරතුරු සපයන්නා ප්රකාශ කර ඇතැයි සඳහන් විය.
පාස්කු ප්රහාරය සම්බන්ධයෙන් බ්රිතාන්යයේ චැනල් 4 නාලිකාව විසින් විකාශය කළ වැඩසටහනේදී අසාද් මවුලානා ලෙස හඳුන්වන මොහොමඩ් මිලාර් මොහොමඩ් හන්සීර් විසින් සිදුකළ හෙළිදරව්වලින්ද මෙම චෝදනාවලට අදාළ කරුණු තහවුරු වන බව අමාත්යවරයා පැවසීය.
තවද, සහරාන් කණ්ඩායම සම්බන්ධයෙන් බුද්ධි තොරතුරුකරුවන් විසින් ලබාදුන් පූර්ව තොරතුරු ඇතුළත් ලිපිගොනු විනාශ කිරීමේ ක්රියාවලියකට සුරේෂ් සලේ මහතා සම්බන්ධ වී ඇති බවට සාක්ෂිකරුවන් ප්රකාශ ලබාදී ඇති බවද අමාත්යවරයා අනාවරණය කළේය.
මෙම ක්රියාකාරකම් 1979 අංක 48 දරන ත්රස්තවාදය වැළැක්වීමේ පනත යටතේ වරදක් ලෙස සැලකිය හැකි බවත්, ත්රස්තවාදී ක්රියාකාරකම් සඳහා සෘජු හෝ වක්ර සහාය ලබාදීම, එවැනි ජාලයන් සැඟවීමට හෝ ආරක්ෂා කිරීමට කටයුතු කිරීම සහ විමර්ශනවලට බාධා කිරීම වැනි චෝදනා සම්බන්ධයෙන් විමර්ශන ක්රියාත්මක වන බවත් අමාත්යවරයා සඳහන් කළේය.
අත්අඩංගුවට ගැනීමෙන් පසු සුරේෂ් සලේ මහතාට නීතියෙන් හිමි සියලු අයිතිවාසිකම් සහ පහසුකම් ලබාදී ඇති බවද අමාත්යවරයා අවධාරණය කළේය. ඔහු නීතිඥවරුන් හමුවීමට, වෛද්ය ප්රතිකාර ලබාගැනීමට සහ අවශ්ය පහසුකම් භාවිත කිරීමට අවස්ථාව සලසා දී ඇති බවත්, මහේස්ත්රාත්වරයා රැඳවුම් ස්ථානය නිරීක්ෂණය කළ අවස්ථාවේදී හෝ වෙනත් කිසිදු අවස්ථාවක සලේ මහතා අමානුෂික සැලකීම් පිළිබඳ පැමිණිල්ලක් ඉදිරිපත් කර නොමැති බවත් ඔහු පැවසීය.
කෙසේ වෙතත්, විමර්ශන කටයුතු සඳහා අවශ්ය වුවද තම ජංගම දුරකථනය සහ පරිගණකය විවෘත කිරීමට අවශ්ය මුරපද මෙතෙක් සලේ විසින් ලබාදී නොමැති බවද අමාත්යවරයා හෙළි කළේය. ඒ අනුව ඔහු විමර්ශන සඳහා කිසිදු සහායක් නොදක්වන බවද අමාත්යවරයා මෙහිදී පෙන්වා දුන්නේය.
මේ අතර, සලේ මහතාගෙන් පසු රාජ්ය බුද්ධි සේවයේ ප්රධානියා ලෙස කටයුතු කළ නියෝජ්ය පොලිස්පති නිලන්ත ජයවර්ධන මහතා තම ජංගම දුරකථනයේ තිබූ දත්ත මකා දමා ඇති බවත් පරිගණක දත්තද විනාශ කර ඇති බවත් විමර්ශනවලදී අනාවරණය වී ඇති බව අමාත්යවරයා සඳහන් කළේය. ඒ අනුව සුරේෂ් සලේ මහතාද සමාන ආකාරයකින් වැදගත් දත්ත විනාශ කර තිබිය හැකි බවට විමර්ශකයින් සැක පළ කරයි.
පාස්කු ප්රහාරය හුදෙක් ත්රස්ත ප්රහාරයක් පමණක් නොව ශ්රී ලංකාවේ ආර්ථිකයට, ජාතික ආරක්ෂාවට සහ සමාජ සහජීවනයට දැඩි හානියක් සිදුකළ සිදුවීමක් බව පෙන්වා දුන් අමාත්ය අනන්ද විජේපාල මහතා, එම ප්රහාරය පිළිබඳ සත්යය සම්පූර්ණයෙන් අනාවරණය කර ගැනීම සඳහා සිදුකරන විමර්ශන කිසිදු බලපෑමක් හෝ විරෝධතාවක් හමුවේ නතර නොකරන බව අවධාරණය කළේය.
