රජය විසින් පාර්ලිමේන්තුවට ඉදිරිපත් කර ඇති 22 වැනි ආණ්ඩුක්රම ව්යවස්ථා සංශෝධන පනත් කෙටුම්පතට එරෙහිව ගොනු කර ඇති පෙත්සම් සලකා බැලීම සඳහා පංච පුද්ගල ශ්රේෂ්ඨාධිකරණ විනිසුරු මඩුල්ලක් පත් කර තිබේ.
අගවිනිසුරු ප්රීති පද්මන් සුරසේන මහතාගේ සභාපතිත්වයෙන් යුත් මෙම විනිසුරු මඩුල්ලට අචල වෙන්ගප්පුලි, අර්ජුන ඔබේසේකර, සම්පත් බී. අබේකෝන් සහ ගිහාන් කුලතුංග යන විනිසුරුවරු ඇතුළත් වෙති.
අදාළ පෙත්සම් හෙට (01) ශ්රේෂ්ඨාධිකරණය හමුවේ සලකා බැලීමට නියමිතය.
22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් ශ්රී ලංකා නීතිඥ සංගමය ඇතුළු පාර්ශ්ව කිහිපයක් විසින් පෙත්සම් ගොනු කර ඇති අතර, එම පෙත්සම් මගින් පනත් කෙටුම්පතේ ව්යවස්ථානුකූලභාවය සම්බන්ධයෙන් අධිකරණ තීරණයක් ඉල්ලා තිබේ.
යෝජිත සංශෝධනයේ ප්රධාන කරුණක් වන්නේ විනිසුරුවරුන්ගේ විශ්රාම වයස් සීමාව ඉහළ නැංවීමයි. ඒ අනුව ශ්රේෂ්ඨාධිකරණ විනිසුරුවරුන්ගේ විශ්රාම වයස අවුරුදු 65 සිට 67 දක්වාත්, අභියාචනාධිකරණ විනිසුරුවරුන්ගේ විශ්රාම වයස අවුරුදු 63 සිට 65 දක්වාත් ඉහළ නැංවීමට යෝජනා කර තිබේ.
මෙම යෝජනාව අධිකරණයේ ස්වාධීනත්වය, බලතල බෙදීම සහ ජනතා පරමාධිපත්යය සම්බන්ධයෙන් බලපෑම් ඇති කළ හැකි බවට පෙත්සම්කරුවන් විසින් කරුණු ඉදිරිපත් කර තිබේ.
පෙත්සම් සළකා බැලීම සඳහා පත් කර ඇති පංච පුද්ගල විනිසුරු මඩුල්ලේ සංයුතිය පිළිබඳවද මේ වනවිට නීති ක්ෂේත්රයේ සහ දේශපාලන ක්ෂේත්රයේ අවධානය යොමුව ඇති අතර, විනිසුරු මඩුල්ලේ සාමාජිකයන් තෝරා ගැනීම සම්බන්ධයෙන් විවිධ අදහස් පළවෙමින් තිබේ.
කෙසේ වෙතත්, මෙම විනිසුරු මඩුල්ල පත් කර ඇත්තේ පනත් කෙටුම්පතේ ව්යවස්ථානුකූලභාවය සම්බන්ධයෙන් අධිකරණය හමුවේ කරුණු විභාග කිරීම සඳහා වන අතර, එහි අවසන් තීරණය හෙට සිට ආරම්භ වන පෙත්සම් විභාගයෙන් අනතුරුව තීරණය වනු ඇත.
රජය මීට පෙර ප්රකාශ කර ඇත්තේ 22 වැනි ආණ්ඩුක්රම ව්යවස්ථා සංශෝධන පනත් කෙටුම්පත සම්බන්ධයෙන් ශ්රේෂ්ඨාධිකරණය ලබාදෙන තීරණයට අනුව ඉදිරි ක්රියාමාර්ග ගන්නා බවයි.
ඒ අනුව හෙට පැවැත්වෙන පෙත්සම් විභාගය 22 වැනි සංශෝධනයේ ඉදිරි ගමන සඳහා තීරණාත්මක අවස්ථාවක් වනු ඇත.
