ශ්රී ලංකාවේ ඉලෙක්ට්රොනික වාහන ආදායම් බලපත්ර නිකුත් කිරීමේ eRL 2.0 පද්ධතියේ සිදුකරන වැදගත් පද්ධති යාවත්කාලීන කිරීමක් හේතුවෙන් පළාත් අටක වාහන ආදායම් බලපත්ර නිකුත් කිරීමේ සේවාව සැප්තැම්බර් 25 වැනිදා සිට සැප්තැම්බර් 28 වැනිදා දක්වා තාවකාලිකව අත්හිටුවීමට නියමිතය.
ඒ අනුව මධ්යම, උතුරු මැද, වයඹ, උතුරු, නැගෙනහිර, සබරගමුව, ඌව සහ දකුණු පළාත්වල මෙම කාලය තුළ eRL 2.0 පද්ධතිය ඔස්සේ ආදායම් බලපත්ර නිකුත් කිරීම සිදු නොවේ. බස්නාහිර පළාත මෙම තාවකාලික අත්හිටුවීමට ඇතුළත් නොවේ.
ඩිජිටල් ආර්ථික අමාත්යාංශය සඳහන් කර ඇත්තේ පද්ධතියේ කාර්යක්ෂමතාව, ස්ථාවරත්වය සහ විශ්වසනීයත්වය වැඩිදියුණු කිරීම සඳහා සිදුකරන අත්යවශ්ය යටිතල පහසුකම් යාවත්කාලීන කිරීමක් වෙනුවෙන් මෙම සේවා අත්හිටුවීම සිදුකරන බවයි.
යාවත්කාලීන කිරීම අවසන් කිරීමෙන් පසු සැප්තැම්බර් 29 වැනි අඟහරුවාදා සිට බලපත්ර නිකුත් කිරීමේ සේවාව පළාත් අටේම සාමාන්ය පරිදි යළි ක්රියාත්මක කිරීමට නියමිත බව පළාත් ප්රවාහන බලධාරීන් දැනුම් දී තිබේ.
එබැවින් ඉදිරි දින කිහිපය තුළ තම වාහන ආදායම් බලපත්රය අලුත් කර ගැනීමට නියමිත වාහන හිමිකරුවන්, මෙම සේවා අත්හිටුවීම සැලකිල්ලට ගෙන අවශ්ය කටයුතු සැප්තැම්බර් 25ට පෙර හෝ සැප්තැම්බර් 29න් පසු සිදුකර ගැනීමට සැලසුම් කරන ලෙස බලධාරීන් ඉල්ලා සිටී.
eRL 2.0 ව්යාපෘතියේ අරමුණ වන්නේ පළාත් මට්ටමින් සිදුකරන වාහන ආදායම් බලපත්ර නිකුත් කිරීමේ ක්රියාවලිය ඩිජිටල් තාක්ෂණය ඔස්සේ වඩාත් කාර්යක්ෂම කිරීමයි. ICTA අනුව පැරණි පද්ධතිය 2009 සිට ක්රියාත්මක වූ අතර, පද්ධතිය වැඩිදියුණු කිරීමේ ව්යාපෘතිය 2020 මාර්තු මාසයේදී ආරම්භ කර තිබේ.
නව පද්ධතියේ එක් අරමුණක් වන්නේ වාහනය ලියාපදිංචි කර ඇති පළාත නොසලකා වෙනත් පළාතකින්ද ආදායම් බලපත්ර ලබාගැනීමේ පහසුකම් වැඩිදියුණු කිරීමයි. මාර්ගගත සේවා පුළුල් කිරීම සහ වාහන ආදායම් බලපත්ර නිකුත් කිරීමේ ක්රියාවලිය වඩාත් කාර්යක්ෂම කිරීමද එහි අරමුණු අතර වේ.
ඒ අනුව, මෙම දින හතරක සේවා අත්හිටුවීම නව නීතියක් හෝ ආදායම් බලපත්ර නිකුත් කිරීම නවතා දැමීමක් නොව, පද්ධතියේ තාක්ෂණික යාවත්කාලීන කිරීමක් සඳහා සිදුකරන තාවකාලික ක්රියාමාර්ගයක් බව බලධාරීන් පෙන්වා දෙයි.
