ලෝකයේ උසම කන්ද වන එවරස්ට් කඳු මුදුන තරණය කිරීමේ හිතකර කාලය ආරම්භ වී ඇතත් ගමන් මාර්ගයට කඩා වැටුණු දැවැන්ත අයිස් කුට්ටියක් හේතුවෙන් මෙවර තරණ කටයුතු දැඩි අවහිරතාවයකට ලක්ව තිබේ. පාදක කඳවුරේ (බේස් කෑම්ප්) සිට පළමු කඳවුර දක්වා දිවෙන මාර්ගය අඩි සියයක් පමණ උසැති දැවැන්ත අයිස් කුට්ටියක් මගින් මෙලෙස අවහිර වී තිබේ.
මෙම අයිස් කුට්ටිය ස්වභාවිකවම දියවී යන තෙක් මග සලකුණු කරන්නන්ට ඉදිරි පියවරක් තැබීමට නොහැකි වී ඇත. සාමාන්යයෙන් අප්රේල් මස මැද භාගය වන විට තෙවන කඳවුර දක්වා මාර්ගය විවෘතව පැවතියද මෙවර පවතින මෙම බාධකය හේතුවෙන් සමස්ත කාලසටහනම සති කිහිපයකින් ප්රමාද වී තිබේ.
කඳු නගින්නන් වෙනුවෙන් මාර්ගයේ කඹ සහ ඉණිමං සවිකරන ‘අයිස්ෆෝල් ඩොක්ටර්ස්’ ලෙස හැඳින්වෙන විශේෂඥ කණ්ඩායම පවසන්නේ මෙම අයිස් කුට්ටිය මගහැර යාමට වෙනත් විකල්ප මාර්ගයක් නොමැති බවයි. එම අයිස් කුට්ටිය මතින් ගමන් කිරීම අතිශය අවදානම් සහගත බැවින් එය දියවී යන තෙක් බලා සිටීම හැර වෙනත් විකල්පයක් ඔවුන් සතු නොවේ. කෙසේ වෙතත් එහි පහළ කොටස මේ වන විටත් දියවෙමින් පවතින බැවින් ඉදිරි දින කිහිපය තුළ එය කඩා වැටෙනු ඇතැයි විශ්වාසය පළ කෙරේ.
මෙම ප්රමාදය නිසා කඳු නගින්නන් සහ බලධාරීන් අතර යම් නොසන්සුන්කාරී තත්ත්වයක් ද නිර්මාණය වී ඇත්තේ ඉදිරි කාලගුණ විපර්යාස පිළිබඳව සලකා බලමිනි. මැයි මස අවසානය දක්වා පමණක් පවතින හිතකර කාලගුණ තත්ත්වය තුළ මෙලෙස කාලය වැය වීම නිසා කඳු මුදුනට ළඟා වීමට ඇති කාල සීමාව පටු වීමේ අවදානමක් පවතී.
මෙහි ප්රතිඵලයක් ලෙස සිය ගණනක් වන කඳු නගින්නන් කෙටි කාලයක් තුළ කඳු මුදුන කරා යාමට උත්සාහ කිරීමෙන් 2019 වසරේදී මෙන් එවරස්ට් ඉහළ කලාපයේ දැවැන්ත මිනිස් තදබදයක් ඇති විය හැකි බවට ප්රවීණ කඳු නගින්නන් අනතුරු අඟවයි.
පවතින අර්බුදයට විසඳුමක් ලෙස නේපාල සංචාරක දෙපාර්තමේන්තුව අපූරු පියවරක් ගැනීමට ද සූදානම් වෙමින් සිටී. ඒ අනුව කඹ සවිකරන කණ්ඩායම සහ ඔවුන්ගේ බර උපකරණ හෙලිකොප්ටර් මගින් දෙවන කඳවුර වෙත ගොඩබස්වා එතැන් සිට ඉහළට මාර්ගය විවෘත කිරීම කෙරෙහි අවධානය යොමු වී ඇත.
මැදපෙරදිග පවතින යුදමය වාතාවරණය සහ ඉන්ධන මිල ඉහළ යාම මධ්යයේ වුවද මෙවරත් විශාල පිරිසක් එවරස්ට් තරණය සඳහා පැමිණ සිටින අතර ඔවුන් සියල්ලන්ම දැන් බලා සිටින්නේ ස්වභාවධර්මයා විසින් මෙම අයිස් බාධකය ඉවත් කර දෙන තෙක්ය.
