ෆේස්බුක්, ඉන්ස්ටග්රෑම් සහ වට්ස්ඇප් හිමිකාරීත්වය දරන මෙටා සමාගම, ඉන්දියාවේ ඉදිකිරීමට නියමිත කෘත්රිම බුද්ධි තාක්ෂණය සඳහා විශේෂයෙන් සකස් කරන දැවැන්ත දත්ත ගබඩා මධ්යස්ථානයක් භාවිත කිරීම සඳහා රිලයන්ස් ඉන්ඩස්ට්රීස් සමාගම සමඟ නව ගිවිසුමකට එළඹ තිබේ.
මෙම ගිවිසුම මඟින් මෙටා සමාගම සහ ඉන්දීය ප්රකෝටිපති ව්යාපාරික මුකේෂ් අම්බානිගේ රිලයන්ස් සමූහය අතර පවතින ව්යාපාරික සබඳතා තවදුරටත් ශක්තිමත් වන බව විදෙස් මාධ්ය වාර්තා කරයි.
ඉන්දියාව කෘත්රිම බුද්ධි තාක්ෂණයේ ප්රධාන මධ්යස්ථානයක් බවට පත් කිරීමේ අරමුණින් රජය විශාල ආයෝජන ආකර්ෂණය කරමින් සිටින අතර, ලොව ප්රමුඛ පෙළේ තාක්ෂණික සමාගම් රැසක්ද එරට තුළ විශාල දත්ත ගබඩා මධ්යස්ථාන ඉදිකිරීම ආරම්භ කර තිබේ.
නව ගිවිසුමට අනුව, බටහිර ඉන්දියාවේ ජම්නගර් නගරයේ විශාල දත්ත ගබඩා මධ්යස්ථානයක් ඉදිකිරීමට රිලයන්ස් සමාගම සැලසුම් කර ඇත. එය නිවාස එක් ලක්ෂ පනස් දහසකට ආසන්න සංඛ්යාවකට විදුලිය සැපයිය හැකි ප්රමාණයේ බලශක්තියක් භාවිත කරන ව්යාපෘතියක් වන අතර, අනාගතයේදී එය තවදුරටත් පුළුල් කිරීමටද නියමිතය.
ජම්නගර් ප්රදේශය රිලයන්ස් සමූහයේ ප්රධාන බලශක්ති හා කාර්මික කලාපය පිහිටි ස්ථානයක් වන අතර, විදුලිය, ජලය සහ අනෙකුත් යටිතල පහසුකම් පහසුවෙන් ලබාගත හැකි වීම මෙම ව්යාපෘතියට විශාල වාසියක් බව විශේෂඥයෝ පෙන්වා දෙති.
මෙටා සමාගම කෘත්රිම බුද්ධි තාක්ෂණය සම්බන්ධ දැනුම සහ අත්දැකීම් ලබාදෙන අතර, රිලයන්ස් සමාගමට අවශ්ය ගොඩනැගිලි සහ යටිතල පහසුකම් සැපයිය හැකි බව ව්යාපාරික විශ්ලේෂකයෝ පවසති.
එමෙන්ම රිලයන්ස් සමාගමට තම පුනර්ජනනීය බලශක්ති ව්යාපෘතිවලින් විදුලිය ලබාගැනීමේ හැකියාව පවතින බැවින්, මෙම මධ්යස්ථානය පවත්වාගෙන යාමේ පිරිවැයද අඩු කරගත හැකි වනු ඇත.
මෙටා සමාගම මේ වන විටත් රිලයන්ස් සමූහයට අයත් ජියෝ සමාගමේ ප්රධාන ආයෝජකයෙකු වන අතර, පසුගිය වසරේදී දෙපාර්ශ්වය එක්ව ව්යාපාරික ආයතන සඳහා කෘත්රිම බුද්ධිය මත පදනම් වූ නව සේවා සහ මෙවලම් සංවර්ධනය කිරීමේ වැඩසටහන්ද ආරම්භ කර තිබුණි.
විශ්ලේෂකයන් පෙන්වා දෙන්නේ මෙම නව ගිවිසුම ඉන්දියාව කෘත්රිම බුද්ධි තාක්ෂණයේ සහ දත්ත ගබඩා කිරීමේ ගෝලීය මධ්යස්ථානයක් බවට පත් කිරීමේ උත්සාහයේ වැදගත් පියවරක් වන බවයි.
මෙටා සහ රිලයන්ස් අතර මෙම හවුල්කාරිත්වය ඉන්දියාවේ කෘත්රිම බුද්ධි අනාගතය හැඩගස්වන වැදගත් පියවරක් ලෙස සැලකේ. එය ආර්ථික වර්ධනයට සහ තාක්ෂණික සංවර්ධනයට දායක විය හැකි නමුත්, දත්ත ආරක්ෂාව සහ බලය සංකේන්ද්රණය වීම සම්බන්ධයෙන් නව ප්රශ්නද මතු කරනු ඇතැයි විචාරකයෝ පෙන්වා දෙති.
ඉන්දියාවේ AI දත්ත මධ්යස්ථාන ව්යාප්තිය ශ්රී ලංකාවට ද නව තාක්ෂණික සහ ආර්ථික අවස්ථා රැසක් නිර්මාණය කළ හැකි වුවද, එම අවස්ථා ප්රයෝජනයට ගැනීමට නම් රටේ ඩිජිටල් යටිතල පහසුකම් සහ තාක්ෂණික ප්රතිපත්ති වේගයෙන් නවීකරණය කළ යුතු බව විචාරකයෝ පෙන්වා දෙති.
