ඇමරිකානු ගුවන් හමුදාවට අයත් B-52 වර්ගයේ දිගු දුර ප්රහාරක බෝම්බ හෙලන යානයක් කැලිෆෝනියා ප්රාන්තයේ පිහිටි එඩ්වර්ඩ්ස් ගුවන් හමුදා කඳවුරෙන් ගුවන්ගත වීමෙන් මොහොතකට පසු කඩා වැටීමෙන් පුද්ගලයින් අට දෙනෙකු ජීවිතක්ෂයට පත්ව තිබේ.
මෙම අනතුර සඳුදා පෙරවරු 11.20ට පමණ (දේශීය වේලාවෙන්) සිදුව ඇති අතර, යානය සාමාන්ය පරීක්ෂණ මෙහෙයුමකට සහභාගි වෙමින් සිටියදී මෙම ඛේදවාචකයට මුහුණ පා ඇති බව වාර්තා වේ. කඩා වැටීමෙන් පසු යානය ගිනිගෙන දැවී ගොස් ඇති අතර, එම ස්ථානයෙන් විශාල කළු දුම් වලාකුළක් අහසට නැගී ඇති අයුරු සැතපුම් ගණනාවක් ඈත සිට ද දැකගත හැකි විය.
එඩ්වර්ඩ්ස් ගුවන් හමුදා කඳවුරේ අණදෙන නිලධාරී කර්නල් ජේම්ස් හේස් ප්රකාශ කළේ, මෙම අනතුරෙන් “විශිෂ්ට ඇමරිකානුවන් අට දෙනෙකු” ජීවිතක්ෂයට පත්ව ඇති බවයි. මියගිය පිරිස අතර හමුදා සාමාජිකයන්, රජයේ සිවිල් සේවකයන්, කොන්ත්රාත් පදනම මත සේවය කළ නිලධාරීන් මෙන්ම Boeing සමාගමේ සේවකයින් දෙදෙනෙකු ද සිටින බව අනාවරණය වී තිබේ.
අනතුර සිදුවූ වහාම යානය ගිනිගෙන ඇති අතර, මුල් දර්ශන සහ තොරතුරු සලකා බැලීමෙන් පසු එය “ජීවිත බේරා ගැනීමට නොහැකි වූ සහ කිසිවෙකුට දිවි ගලවා ගැනීමට අවස්ථාවක් නොතිබූ” අනතුරක් බවට නිගමනය කර ඇති බව කඳවුරේ බලධාරීහු පවසති.
යානය කඩා වැටීමට හේතුව මෙතෙක් නිශ්චිතව අනාවරණය වී නොමැති අතර, සිද්ධිය සම්බන්ධයෙන් ස්වාධීන පරීක්ෂණ කිහිපයක් ආරම්භ කර තිබේ. මූලික පරීක්ෂණ වාර්තාවක් දින 30ක් ඇතුළත අපේක්ෂා කළද, සම්පූර්ණ හේතුව අනාවරණය කර ගැනීමට මාස හයකට වැඩි කාලයක් ගත විය හැකි බව බලධාරීන් සඳහන් කරයි.
අනතුරින් මියගිය Boeing සමාගමේ සේවකයන් දෙදෙනා පිළිබඳව සමාගම ද තහවුරු කර ඇති අතර, ඔවුන්ගේ පවුල්වලට සහයෝගය ලබාදීමට කටයුතු කරමින් සිටින බව නිවේදනය කර තිබේ.
කැලිෆෝනියා ආණ්ඩුකාර ගැවින් නිව්සම් මෙම සිදුවීම “ඉතා දුක්බර ඛේදවාචකයක්” ලෙස හඳුන්වා දී ඇති අතර, මියගිය සියලු දෙනාගේ පවුල්වලට සහ එඩ්වර්ඩ්ස් ගුවන් හමුදා ප්රජාවට සිය ශෝකය පළ කර තිබේ.
1950 දශකයේ සිට ඇමරිකානු හමුදාව භාවිත කරන B-52 Stratofortress යානා ලෝකයේ වඩාත්ම ප්රසිද්ධ ප්රහාරක බෝම්බ හෙලන යානා අතරින් එකකි. අඩි 50,000ක පමණ උසකින් පියාසර කළ හැකි මෙම යානා සාමාන්ය බෝම්බ සිය ගණනක් මෙන්ම න්යෂ්ටික කෘස් මිසයිල 32ක් ද රැගෙන යාමේ හැකියාවෙන් යුක්ත වේ.
මධ්යගුවන් ඉන්ධන පිරවීමේ හැකියාව හේතුවෙන් B-52 යානා වලට සීමාවකින් තොරව දිගු දුර මෙහෙයුම්වල නිරත විය හැකි අතර, සීතල යුද්ධ සමයේ ඇමරිකාවේ ප්රධාන න්යෂ්ටික බලවේගයක් ලෙස ද කටයුතු කර තිබේ.
ලොස් ඇන්ජලීස් නගරයට උතුරින් සැතපුම් 100ක් පමණ දුරින් පිහිටි මොහාවේ කාන්තාරයේ ඇති එඩ්වර්ඩ්ස් ගුවන් හමුදා කඳවුර, ඇමරිකාවේ ප්රධාන ගුවන් පරීක්ෂණ මධ්යස්ථානයක් ලෙස සැලකේ. අනතුරෙන් පසු කඳවුරේ සියලු ගුවන් මෙහෙයුම් තාවකාලිකව නවතා දමා ඇති අතර, පැමිණෙන ගුවන් යානා වෙනත් ගුවන් තොටුපළ වෙත හරවා යවා තිබේ.
මෙම අනතුර ඇමරිකානු ගුවන් හමුදාවට මෙන්ම බොයිං සමාගමට ද දැඩි කම්පනයක් එල්ල කර ඇති අතර, මියගිය පිරිසගේ පවුල් වෙත ලොව පුරා ශෝක පණිවිඩ ගලා එමින් පවතී.
