බ්රිතාන්ය අග්රාමාත්ය කෙයර් ස්ටාමර් සිය ඉල්ලා අස්වීම ප්රකාශයට පත් කිරීමත් සමඟ ඉදිරියේදී ඔහුට අංක 10 ඩවුනින් වීදියේ (Downing Street) පිහිටි නිල නිවසින් නික්ම යාමට සිදු වනු ඇත. බ්රිතාන්යයේ දේශපාලන නායකයින් මෙලෙස නිරන්තරයෙන් පැමිණෙමින් සහ යමින් සිටිය ද, එම නිල නිවසේ වසර 15ක් පුරා ස්ථාවරව රැඳී සිටින එක් සුවිශේෂී පදිංචිකරුවෙකු සිටී. ඒ, බ්රිතාන්ය දේශපාලනයේ වඩාත්ම ජනප්රිය මුහුණක් බවට පත්ව සිටින ‘ලැරී’ (Larry) නැමැති බළලාය.
බ්රිතාන්ය රජයේ නිල “ප්රධාන මීයන් අල්ලන්නා” (Chief Mouser) ලෙස කටයුතු කරන ලැරී, 2011 වසරේ සිට ඩවුනින් වීදියේ ජීවත් වන අතර මේ වන විට සිය 7 වැනි අග්රාමාත්යවරයා පිළිගැනීමට සූදානමින් සිටී. මේ වන විට අග්රාමාත්යවරුන් හය දෙනෙකුගේ පාලන කාලයන් සහ අසංඛ්යාත දේශපාලන අර්බුද රැසක් පසුකර යෑමට ලැරී සමත්ව ඇත.
දැනට 19 වැනි වියේ පසුවන ලැරී (මිනිස් වයසින් වසර 90කට වඩා වැඩි), 2011 පෙබරවාරි මාසයේදී එවකට සිටි අග්රාමාත්ය ඩේවිඩ් කැමරන් සහ ඔහුගේ බිරිඳ විසින් ‘බැටර්සී’ බලු සහ බළල් නිවාසයෙන් (Battersea Dogs and Cats Home) හදාවඩා ගැනීම සඳහා රැගෙන එන ලද්දකි.
කෙසේ වෙතත්, ලැරී කිසිදු දේශපාලන නායකයෙකුට පුද්ගලිකව අයිති සතෙකු නොවේ. ඔහු අංක 10 ඩවුනින් වීදියේ නිල පදිංචිකරුවෙකු මෙන්ම, අග්රාමාත්ය නිල නිවස අවට මීයන් මර්දනය කිරීමේ නිල වගකීම පැවරී ඇති “රාජ්ය නිලධාරියෙකු” ලෙස සැලකේ.
බ්රිතාන්යයේ රජ මාලිගා සහ රජයේ ගොඩනැඟිලි තුළ බළලුන් ඇති කිරීමේ සම්ප්රදාය 8 වැනි හෙන්රි රජුගේ සමය දක්වා, එනම් සියවසකට වඩා ඈත අතීතයකට දිවයන්නකි. ලැරීට පෙර ඩවුනින් වීදියේ නිල වශයෙන් සේවය කළේ 1989 සිට 1997 දක්වා සිටි ‘හම්ප්රි’ (Humphrey) නැමැති බළලාය. ඉන්පසු නිල වශයෙන් එම තනතුරට පත් වූ පළමු බළලා වන්නේ ලැරී ය.
මාධ්යවේදීන්, සංචාරකයින් සහ දේශපාලන නිරීක්ෂකයින් අතර දැඩි ආකර්ෂණයක් දිනා සිටින ලැරී, ඩවුනින් වීදියේ ප්රසිද්ධ කළු පැහැති දොරටුව අසල ලැග සිටින අයුරු, පරෙවියන් පන්නන අයුරු මෙන්ම ප්රධාන දේශපාලන අවස්ථාවලදී කැමරා ඉදිරියට පැමිණෙන අයුරු නිරන්තරයෙන් දැකගත හැකිය.
බ්රිතාන්ය දේශපාලන කරළිය නැවත වරක් වෙනස් වෙමින් පැවතිය ද, ඩවුනින් වීදියේ වැඩිම කාලයක් සේවය කළ පදිංචිකරුවා ලෙස ලැරී සිය රාජකාරි අඛණ්ඩව කරගෙන යනු ඇත.
