ජර්මනියේ හැම්බර්ග් නගරයට ආසන්න ස්ටේඩ් (Stade) නගරයේ පිහිටි ළමා හා මාතෘ සුභසාධන මධ්යස්ථානයක සිදුවූ බිහිසුණු වෙඩි තැබීමකින් එහි සේවකයින් හය දෙනෙකු ජීවිතක්ෂයට පත්ව ඇති බව ජර්මන් පොලිසිය පවසයි. මියගිය පිරිස අතර කාන්තාවන් සිව්දෙනෙකු සහ පිරිමින් දෙදෙනෙකු වන අතර, තවත් කිහිප දෙනෙකු තුවාල ලබා ඇති බව වාර්තා වේ.
මෙම ප්රහාරයට හේතුවී ඇත්තේ සැකකරුගේ තෙමස් හැවිරිදි දියණියගේ භාරකාරත්වය සම්බන්ධයෙන් පැවති පවුල් ආරවුලකි. වෙඩි තැබීම සිදුවන අවස්ථාවේදී අදාළ බිළිඳිය සහ ඇයගේ මව එම කාර්යාලය තුළ සිට ඇති නමුත් ඔවුන්ට කිසිදු අනතුරක් සිදුවී නොමැත.
පොලිස් වාර්තාවලට අනුව, ප්රහාරය එල්ල කර ඇත්තේ හැනෝවර් හි පදිංචි, ජර්මනියේ උපන් 45 හැවිරිදි තුර්කි ජාතිකයෙකි. සිය දියණියගේ භාරකාරත්වය පිළිබඳව සාකච්ඡා කිරීම සඳහා සිද්ධිය වූ සඳුදා දින ඔහු මෙම මධ්යස්ථානය වෙත පැමිණ ඇත. ඔහු මීට පෙර විවිධ තර්ජන කිරීම් සම්බන්ධයෙන් පොලිසියට වාර්තා වී ඇති අයෙකු වුවද, මෙතරම් ප්රචණ්ඩකාරී ලෙස හැසිරෙනු ඇතැයි අපේක්ෂා නොකළ බවත්, ඔහු සතුව ගිනිඅවි බලපත්රයක් නොතිබූ බවත් ලූන්බර්ග් පොලිස් ප්රධානී කැත්රින් ෂූල් ප්රකාශ කළාය.
ලෝවර් සැක්සනි ප්රාන්තයේ අභ්යන්තර කටයුතු අමාත්ය ඩැනියෙලා බෙහ්රන්ස් මාධ්ය වෙත අදහස් දක්වමින් කියා සිටියේ මෙය කිසිදු දේශපාලනික හෝ ආර්ථික අරමුණකින් තොරව, පවුල් ආරවුලක් මත සිදුකළ සාහසික අපරාධයක් බවයි.
වෙඩි තැබීමෙන් පසු සැකකරු කාන්තාවක විසින් පදවන ලද මෝටර් රථයකින් පළා ගොස් තිබේ. එම අවස්ථාවේදී පොලිසිය රථයට වෙඩි තබා ඇති අතර, පසුව ආසන්න ගම්බද මාර්ගයකදී ටයරයක් පිපිරී ගිය මර්සිඩීස් රථයක් වටලා සැකකරු සහ රියදුරු කාන්තාව ඇතුළු තිදෙනෙකු පොලිස් භාරයට ගෙන ඇත.
සිද්ධියත් සමඟ ප්රදේශයේ ආරක්ෂාව තර කර ඇති අතර, අසල පිහිටි පාසල් සහ දිවා සුරැකුම් මධ්යස්ථානවල සිටි දරුවන් ආරක්ෂිතව ඔවුන්ගේ දෙමාපියන් වෙත භාර දීමට පියවර ගෙන තිබේ. පොලිසිය අවධාරණය කරන්නේ මේ වන විට මහජනතාවට තවදුරටත් කිසිදු තර්ජනයක් නොමැති බවයි.
