වෙනිසියුලාවේ පසුගියදා සිදුවූ ප්රබල භූ කම්පන ද්විත්වයෙන්, එරට දෙවන පෙළ පාපන්දු කණ්ඩායමක් වන ‘ක්ලබ් ස්පෝර්ට් මරීටිමෝ ලගුවයිරා’ (Club Sport Marítimo La Guaira) හි ක්රීඩා කරන ආර්ජන්ටිනා ජාතික ක්රීඩක ලූකස් ට්රෙජෝගේ (Lucas Trejo) බිරිඳ සහ දරුවන් දෙදෙනා ජීවිතක්ෂයට පත්ව ඇති බව තහවුරු වී තිබේ.
ප්රහාරයෙන් පසු විනාශ වූ සුන්බුන් අතර දින තුනක් මුළුල්ලේ සිය බිරිඳ වන යානිනා සහ දරුවන් වන ආරොන් සහ අයිනෝවා සෙවීමට 38 හැවිරිදි ට්රෙජෝ දැඩි උත්සාහයක නිරත වූ නමුත්, එම සෙවීම් ඛේදවාචකයකින් කෙළවර වූ බව ඔහුගේ පාපන්දු සමාජය නිල වශයෙන් නිවේදනය කළේය.
ඇමරිකානු භූ විද්යා සමීක්ෂණ ආයතනයට අනුව තත්පර 39ක් ඇතුළත භූමිකම්පා දෙකක් එකවර සිදුවීමෙන් (Doublet earthquake) මෙම මහා විනාශය සිදුවී ඇත. භූමිකම්පාව සිදුවන අවස්ථාවේදී ට්රෙජෝ කරකාස් අගනුවර පුහුණු කඳවුරක සිට ඇති අතර, පසුව ඔහු වහාම සිය වෙරළබඩ නිවස පිහිටි ලගුවයිරා ප්රදේශය වෙත පැමිණ තිබේ.
නමුත් ඔහු පැමිණෙන විට ඔවුන් ජීවත් වූ ගොඩනැගිල්ල සම්පූර්ණයෙන්ම බිමට සමතලා වී තිබූ බව ඔහුගේ මස්සිනා වන රිකාඩෝ ආර්ඩිලස් සී.එන්.එන් (CNN) පුවත් සේවයට පවසා ඇත. බර යන්ත්රෝපකරණ හිඟකම හේතුවෙන් සුන්බුන් ඉවත් කිරීම ප්රමාද වූ අතර, ක්රීඩකයින් සහ මිතුරන් ඒ සඳහා උදව් ඉල්ලා සමාජ මාධ්ය ඔස්සේ වීඩියෝ පට පවා නිකුත් කර තිබුණි.
මෙම භූමිකම්පාවෙන් වෙනිසියුලාවේ පුද්ගලයින් 1,400කට වැඩි පිරිසක් මියගොස් දහස් ගණනක් අතුරුදන් වී ඇති අතර, එරට පාපන්දු ක්ෂේත්රයට ද ඉන් දැඩි බලපෑමක් එල්ල වී ඇත. මෑතකදී දෝහා හි පැවැති වයස 17න් පහළ ලෝක කුසලානයට ක්රීඩා කළ 18 හැවිරිදි දක්ෂ තරුණ ක්රීඩකයෙකු වන යිම්වර්ට් බෙරොටෙරන් (Yimvert Berroteran) මෙන්ම තරුණ ක්රීඩකයින් වන වික්ටර් පැලසියෝස් සහ රසාන් සිජා ද මෙම භූමිකම්පාවෙන් ජීවිතක්ෂයට පත්ව ඇත.
මීට අමතරව වෙනිසියුලාවේ සංචාරය කරමින් සිටි සහ පදිංචිව සිටි චීන ජාතිකයින් 8 දෙනෙකු සහ ස්පාඤ්ඤ ජාතිකයින් 9 දෙනෙකු ද මියගිය පිරිස අතර වන බව විදේශ වාර්තා සඳහන් කරයි.
දැනට භූමිකම්පාව සිදුවී දින කිහිපයක් ගොස් ඇති බැවින්, සුන්බුන් අතර සිරවී සිටින ජීවතුන් අතර සිටින අය සොයා ගැනීමේ සම්භාවිතාව වේගයෙන් අඩු වෙමින් පවතින බව සහන සේවා නිලධාරීන් ප්රකාශ කරති.
