ගායිකාවක සහ ක්‍රීඩකයෙකු එක්කරමින් ඇමරිකාවම හෙල්ලූ ‘සුපිරි විවාහය’

ලෝක ප්‍රකට පොප් ගීත ක්ෂේත්‍රයේ සහ ක්‍රීඩා ක්ෂේත්‍රයේ දැවැන්තයන් දෙදෙනෙකු වන ටේලර් ස්විෆ්ට් (Taylor Swift) සහ ට්‍රැවිස් කෙල්සි (Travis Kelce) නිව්යෝර්ක් නුවර මැඩිසන් ස්ක්වෙයාර් ගාර්ඩන් (Madison Square Garden) ක්‍රීඩාංගණයේදී පසුගියදා අති උත්කර්ෂවත් අන්දමින් විවාහ ගිවිස ගත්හ.

බටහිර සංගීත ලෝකයේ ඉහළම තලයේ වැජඹෙන, ලොව බලගතුම කාන්තාවන් අතර ඉදිරියෙන්ම සිටින ගායිකාවක වන ටේලර් ස්විෆ්ට් සහ ඇමරිකානු ප්‍රකට ෆුට්බෝල් (American Football) ක්‍රීඩක ට්‍රැවිස් කෙල්සිගේ මෙම විවාහය, වත්මන් ලෝක පොප් සංස්කෘතියේ සහ ක්‍රීඩා ලෝකයේ සුවිශේෂී සන්ධිස්ථානයක් ලෙස සැලකේ.

අමුත්තන් 1,000කට අධික පිරිසකගේ සහභාගීත්වයෙන් පැවැත්වුණු මෙම මංගල්‍යයේ ප්‍රධාන කාර්යභාරයක් ඉටු කළේ ලෝක ප්‍රකට හොලිවුඩ් නළු ඇඩම් සැන්ඩ්ලර් (Adam Sandler) ය. සාම්ප්‍රදායික මනාලියන්ගේ සහ මනාලයන්ගේ පාර්ශවයන්ගෙන් (Bridesmaids/Groomsmen) තොරව පැවැත්වුණු මෙහි, ටේලර්ගේ එකම සහෝදරයා වන ඔස්ටින් ස්විෆ්ට් ඇයගේ ප්‍රධාන සහකරු ලෙසත්, ට්‍රැවිස්ගේ සහෝදරයා වන ජේසන් කෙල්සි ඔහුගේ හොඳම මිතුරා ලෙසත් කටයුතු කළහ.

ලොව සුප්‍රකට විලාසිතා ආයතනයක් වන ‘ක්‍රිස්ටියන් ඩියෝර්’ (Christian Dior) ආයතනය මගින් මනාල යුවළගේ ඇඳුම් නිර්මාණය කර තිබූ අතර, මෙය එම ආයතනය ලෝක ප්‍රකට තරුවක් වෙනුවෙන් නිර්මාණය කළ පළමු මංගල ඇඳුමද වේ.

දින දෙකක් පුරා පැවැත්වුණු මෙම මංගල උත්සවය හේතුවෙන් නිව්යෝර්ක් නුවර අතිශය කාර්යබහුල වීදි රැසක් වසා දැමීමට පොලිසියට සිදු විය. සෙල්සියස් අංශක 37ක දැඩි රශ්මියක් පැවතියද, දහස් සංඛ්‍යාත රසික රසිකාවියන් (Swifties) තම ආදරණීය ගායිකාව දැකබලා ගැනීම සඳහා ක්‍රීඩාංගණය අවට මඟ දෙපස රැස්ව සිටියහ.

සාමාන්‍යයෙන් ප්‍රසංග සහ ක්‍රීඩා තරඟ සඳහා පමණක් යොදාගන්නා, 20,000කට අධික පිරිසකට අසුන්ගත හැකි මෙම දැවැන්ත ක්‍රීඩාංගණය මංගල්‍යයක් සඳහා තෝරා ගැනීම බොහෝ දෙනෙකුට පුදුමයක් විය. සැළසුම්කරුවන්ට අනුව මෙවැනි ස්ථානයක් කුලියට ගැනීම සඳහා ඔවුන් ඩොලර් මිලියන ගණනක (රුපියල් කෝටි සිය ගණනක) මුදලක් වැය කර ඇත. කෙසේ වෙතත්, මෙහි ඇති ඉහළ රහස්‍යභාවය සහ ආරක්ෂාව නිසා මෙම තේරීම සිදුකර ඇති බව පැවසේ.

චිත්‍රපටයකින් ආභාෂය ලැබූ ‘රහසිගත’ මංගල සැරසිලි

මැඩිසන් ස්ක්වෙයාර් ගාර්ඩන් නම් මෙම දැවැන්ත සංවෘත ක්‍රීඩාංගණයේ ඇතුළාන්තය, ‘ඇලිස් ඉන් වොන්ඩර්ලෑන්ඩ්’ (Alice in Wonderland) සහ ‘ද විසාර්ඩ් ඔෆ් ඕස්’ (The Wizard of Oz) යන සුප්‍රකට සුරංගනා කතා තේමාවන් සිහිගන්වන අයුරින් අලංකාර උද්‍යානයක් ලෙස සම්පූර්ණයෙන්ම වෙනස් කර තිබුණි. ටේලර් ස්විෆ්ට්ගේ ‘Wi$h Li$t’ නමැති ජනප්‍රිය ගීතයට ආභාෂය දුන්, ඇය ඉතාමත් ප්‍රිය කරන ප්‍රකට හොලිවුඩ් නළු ඇඩම් සැන්ඩ්ලර් මෙහි මංගල කටයුතු මෙහෙයවූ අතර, ඔහු එදින රාත්‍රියේ මනාල යුවළ වෙනුවෙන් සුවිශේෂී හාස්‍යජනක ගීතයක්ද ගායනා කළේය. ටේලර් තම මංගල ඇඳුම සමඟින් දිගු වේලාවක් බිම ඇදී යන සුදු පැහැති සළු වැස්මක් (Veil) පැළඳ සිටි අතර, ට්‍රැවිස් සුදු පැහැති ටක්සිඩෝ (Tuxedo) ඇඳුමකින් සැරසී සිටියේය.

මෙම විවාහ උත්සවය සඳහා සෙලීනා ගෝමස්, බ්‍රැඩ්ලි කූපර්, මිලී බොබී බ්‍රවුන් සහ සුප්‍රකට චිත්‍රපට අධ්‍යක්ෂ ස්ටීවන් ස්පිල්බර්ග් ඇතුළු ලෝක ප්‍රකට හොලිවුඩ් නළු නිළියන් සහ ගායක ගායිකාවන් රැසක් සහභාගී වූහ. දැඩි ආරක්ෂක විධිවිධාන මධ්‍යයේ ජංගම දුරකථන සහ ඡායාරූප ගැනීම් සීමා කර තිබූ මෙම උත්සවයේදී, ලෝක ප්‍රකට ‘ෆ්ලීට්වුඩ් මැක්’ (Fleetwood Mac) කණ්ඩායමේ ස්ටීවී නික්ස් (Stevie Nicks) විසින් සජීවී ගීත ගායනයක්ද ඉදිරිපත් කරන ලදී. මනාලියක ලෙස ටේලර් ස්විෆ්ට් මංගල පීඨය වෙත පිය නැගුවේද වයලීන ඇතුළු තන්තු වාද්‍ය භාණ්ඩ (Strings) මගින් වැයුණු ඇයගේම ආදරණීය ගීතයක තනුවකට වීම විශේෂත්වයකි.

විවාහය නිමවීමත් සමඟම නිව්යෝර්ක් නුවර ප්‍රකට ‘එම්පයර් ස්ටේට්’ (Empire State) ගොඩනැගිල්ල පවා රෝස සහ ලැවෙන්ඩර් වර්ණයෙන් ආලෝකමත් කරමින් මෙම යුවළට සුබ පැතුම් එක් කර තිබුණි.

විවාහයට පෙර මෙම යුවළ විසින් පුණ්‍යායතන 20කට අධික සංඛ්‍යාවක් සඳහා ඇමරිකානු ඩොලර් මිලියන 26ක (රුපියල් බිලියන ගණනක) දැවැන්ත මුදලක් පරිත්‍යාග කර තිබීමද විශේෂත්වයකි.

සංගීත විචාරකයන් පවසන පරිදි, මෙම විවාහය හුදෙක් පුද්ගලයන් දෙදෙනෙකුගේ එකතුවක් පමණක් නොවේ. ඇමරිකානුවන් වඩාත්ම ආදරය කරන සහ ගරු කරන ‘සංගීතය’ සහ ‘ක්‍රීඩාව’ යන සංස්කෘතීන් දෙකෙහිම මහා සංකලනයකි.