ශ්රී ලාංකික සම්භවයක් ඇති බ්රිතාන්ය ජාතික මවක් සිය ඇමරිකානු ජාතික හිටපු සැමියාගේ භාරයේ සිටි කුඩා පුතුන් දෙදෙනා රැගෙන එක්සත් රාජධානියේ අතුරුදන්ව සිටින බව විදෙස් මාධ්ය වාර්තා කරයි.
34 හැවිරිදි නිෂිකා සමරතුංග නමැති කාන්තාව, පස් හැවිරිදි බ්ලේන් බේයර් සහ තෙවසරක් වයසැති නේතනියෙල් (නේට්) බේයර් යන සිය පුතුන් සමඟ මාස තුනකට අධික කාලයක් සැඟවී සිටින බව සඳහන් වේ.
මෙම දරුවන් දෙදෙනා ඇමරිකාවේ කොලරාඩෝ ප්රාන්තයේ සිය පියා වන බෙන් බේයර් සමඟ ජීවත් වූ අතර, දෙමාපියන්ගේ දික්කසාදයෙන් පසු අධිකරණ නියෝගයකට අනුව මව හමුවීම සඳහා පසුගිය මාර්තු මාසයේදී එක්සත් රාජධානියට පැමිණ තිබිණි.
කෙසේ වෙතත්, මාර්තු 29 වැනිදා දරුවන් නැවත ඇමරිකාවට රැගෙන යාමට නියමිතව තිබියදී, නිෂිකා සමරතුංග ඔවුන් ගුවන් තොටුපොළ වෙත රැගෙන නොපැමිණි අතර එතැන් සිට මව සහ දරුවන් තිදෙනා සිටින ස්ථානය පිළිබඳ කිසිදු තොරතුරක් ලැබී නොමැත.
දරුවන්ගේ පියා වන බෙන් බේයර්, තම පුතුන් ආරක්ෂිතව නැවත ලබාගැනීම සඳහා ලන්ඩන් මහාධිකරණයේ නඩු පවරා ඇති අතර, ඔහුගේ නීතිඥයන් පවසන්නේ දරුවන් දෙදෙනා පාසලකට හෝ පෙර පාසලකට නොයන බවත්, අවශ්ය වෛද්ය ප්රතිකාර ද නොලැබෙන බවට දැඩි සැකයක් පවතින බවයි.
“අපේ විවාහය බිඳ වැටීම අසීරු අත්දැකීමක් වුණත්, නිෂිකා අපේ දරුවන් පැහැරගෙන ගොස් මගෙන් සඟවයි කියලා මම කවදාවත් හිතුවේ නැහැ,” යැයි බෙන් බේයර් ප්රකාශ කර ඇත.
ඔහු පෙන්වා දෙන්නේ දරුවන් දෙදෙනාම ඔටිසම් තත්ත්වයෙන් (Autism) පෙළෙන බැවින්, ඔවුන්ගේ දෛනික ජීවිතයේ මෙවැනි හදිසි වෙනස්කම් ඔවුන්ගේ මානසික සහ ශාරීරික වර්ධනයට බරපතළ ලෙස බලපාන බවයි.
එමෙන්ම, “ඇය නිවැරදි දේ කරලා දරුවන් නැවත මට භාර දෙයි කියලා මම බලාපොරොත්තු වෙනවා. ඔවුන් සිටින තැන දන්නා කවුරුන් හෝ සිටිනවා නම්, කරුණාකර ඔවුන් ආරක්ෂිතව නිවසට ගෙන ඒමට උදව් කරන්න,” යැයිද ඔහු ඉල්ලා ඇත.
මෙම නඩුවේ තොරතුරු ප්රසිද්ධ කිරීමට ලන්ඩන් මහාධිකරණය අවසර ලබාදී ඇත්තේ දරුවන් සොයා ගැනීමේ කටයුතු සඳහා මහජන සහාය ලබාගැනීමේ අරමුණින් බව සඳහන් වේ.
නිෂිකා සමරතුංග 2020 වසරේදී බෙන් බේයර් සමඟ විවාහ වී ඇමරිකාවට පදිංචියට ගිය අතර, 2024 වසරේදී ඔවුන්ගේ විවාහය බිඳ වැටී තිබේ. පසුව ඇය දරුවන් ලන්ඩනයට රැගෙන යාමට කොලරාඩෝ අධිකරණයෙන් අවසර ඉල්ලා සිටියද එය ප්රතික්ෂේප කර තිබිණි.
ඉන් අනතුරුව අධිකරණය දරුවන්ගේ ප්රධාන භාරකාරත්වය පියාට ලබාදී, දරුවන් කොලරාඩෝ ප්රාන්තයෙන් පිටතට ස්ථිරව රැගෙන යාම තහනම් කර තිබූ අතර, මව හමුවීම සඳහා පමණක් එක්සත් රාජධානියට රැගෙන යාමට අවසර දී තිබුණි.
දරුවන් අතුරුදන්වීමෙන් අනතුරුව ලන්ඩන් මහාධිකරණය JP Morgan Chase, HSBC, Thames Water සහ එක්සත් රාජධානියේ ජාතික සෞඛ්ය සේවය (NHS) ඇතුළු ආයතන කිහිපයකට දත්ත ලබාදෙන ලෙස නියෝග කළද, මේ දක්වා මව සහ දරුවන්ගේ ස්ථානය පිළිබඳ කිසිදු හෝඩුවාවක් සොයාගෙන නොමැත.
මේ අතර, ඇමරිකාවේ කොලරාඩෝ අධිකරණයක් පසුගිය අප්රේල් මාසයේදී දරුවන් දෙදෙනා “ක්ෂණික අනතුරකට ලක්විය හැකි විශ්වාසදායක අවදානමක්” පවතින බව සඳහන් කරමින්, ඔවුන්ගේ භාරකාරත්වය ඇමරිකානු නීතිය ක්රියාත්මක කරන ආයතන වෙත පැවරීමට ද අවසර ලබාදී ඇත.
දරුවන්ගේ පියා වෙනුවෙන් පෙනී සිටින නීතිඥ ඇමි රෝව් පවසන්නේ, “මේ දරුවන් දෙදෙනා ඉතා කුඩා හා අවදානම් තත්ත්වයේ පසුවන දරුවන්. ඔවුන් අතුරුදන්ව සිටින සෑම දිනක්ම ඔවුන්ගේ ආරක්ෂාව පිළිබඳ ඇති සැලකිල්ල තවත් වැඩි කරයි. ඔවුන් හැකි ඉක්මනින් සොයාගෙන ආරක්ෂිතව නිවසට රැගෙන ඒම අත්යවශ්යයි,” යනුවෙනි.
