හෝමාගම, කටුවාන කර්මාන්ත පුරයේ පිහිටි ආරක්ෂිත හිස්වැසුම් (හෙල්මට්) නිෂ්පාදනය කරන කර්මාන්ත ශාලාවක අද (21) උදෑසන හටගත් දැවැන්ත ගින්නකින් සේවකයින් පස්දෙනෙකු ජීවිතක්ෂයට පත්ව ඇති අතර, තවත් කාන්තාවක් තුවාල ලබා රෝහල්ගත කර තිබේ.
උදෑසන 9.45ට පමණ හටගත් ගින්න ඉතා කෙටි කාලයක් තුළ තට්ටු තුනකින් යුත් කර්මාන්ත ශාලාව පුරා ව්යාප්ත වී ඇති අතර, ප්රදේශයම ඝන කළු දුමාරයකින් වැසී ගොස් තිබූ බව ප්රදේශවාසීහු පැවසූහ.
ගින්න හටගත් අවස්ථාවේදී කර්මාන්ත ශාලාව තුළ සේවකයින් 80කට අධික පිරිසක් සේවයේ නිරතව සිට ඇති අතර, ඔවුන්ගේ ආරක්ෂාව තහවුරු කිරීම සඳහා පොලීසිය, ගිනිනිවන භටයින් සහ අනෙකුත් හදිසි සේවා අංශ එක්ව මෙහෙයුම් ක්රියාත්මක කළේය.
කෝට්ටේ මහ නගර සභාවේ ගිනිනිවීමේ ඒකකය ඇතුළු ගිනිනිවන රථ හයක් යොදවා පැය කිහිපයක මෙහෙයුමකින් අනතුරුව ගින්න සම්පූර්ණයෙන්ම පාලනය කිරීමට හැකි වූ බව බලධාරීහු පැවසූහ.
ගිනිනිවීමේ මෙහෙයුම් අතරතුර මුලින් ගින්නට සිරවූ පුද්ගලයින් තිදෙනෙකු සිටින බවට සැක කළද, පසුව සිදුකළ සෝදිසි මෙහෙයුම්වලදී ගින්නෙන් ජීවිතක්ෂයට පත් පුද්ගලයින් පස්දෙනෙකුගේ සිරුරු සොයාගෙන තිබේ.
නිලධාරියෙකු සඳහන් කළේ, ගින්න දැඩි ලෙස පැතිර ගොස් තිබූ හෙයින් ගොඩනැගිල්ල තුළ සිරව සිටි පිරිස වෙත කඩිනමින් ළඟා වීම ඉතා අපහසු වූ බවයි.
එමෙන්ම මියගිය පුද්ගලයින්ගෙන් තිදෙනෙකුගේ සිරුරු හඳුනාගත නොහැකි තරම් අධික ලෙස පිළිස්සී තිබූ බවද පොලීසිය සඳහන් කළේය.
මේ අතර ගින්නෙන් තුවාල ලැබූ කාන්තාවක් ප්රතිකාර සඳහා රෝහල්ගත කර ඇති අතර, ඇයගේ සෞඛ්ය තත්ත්වය පිළිබඳ වැඩිදුර තොරතුරු මෙතෙක් නිකුත් කර නොමැත.
ගින්න ඇතිවීමට නිශ්චිත හේතුව මෙතෙක් අනාවරණය වී නොමැති අතර, හෝමාගම පොලීසිය, ගිනිනිවීමේ නිලධාරීන් සහ අදාළ තාක්ෂණික නිලධාරීන් එක්ව සිද්ධිය සම්බන්ධයෙන් පුළුල් විමර්ශනයක් ආරම්භ කර තිබේ.
මෙම සිද්ධිය මෙරට කාර්මික ආරක්ෂාව පිළිබඳ නැවතත් බරපතළ අවධානයක් යොමු කළ යුතු ඛේදනීය අනතුරක් ලෙස සැලකෙන අතර, කර්මාන්ත ශාලාවේ ආරක්ෂක ක්රමවේද, හදිසි පිටවීමේ පහසුකම් සහ ගිනි ආරක්ෂණ පද්ධති පිළිබඳවද විශේෂ විමර්ශනයක් සිදුකිරීමට නියමිතය.
