ශ්රී ලංකාවේ මගී ප්රවාහනය සඳහා ඩ්රෝන යානා භාවිත කිරීමේ නියමු ව්යාපෘතියක් ලබන මාසයේ ආරම්භ කිරීමට සැලසුම් කර ඇති බව වරාය හා ගුවන් සේවා නියෝජ්ය අමාත්ය රුවන් කොඩිතුවක්කු මහතා පවසයි.
මෙම නියමු ව්යාපෘතියෙන් පසු මාස හයක් ඇතුළත වාණිජ මගී ඩ්රෝන සේවාවක් ශ්රී ලංකාවේ ආරම්භ කිරීම රජයේ අපේක්ෂාව බවද නියෝජ්ය අමාත්යවරයා සඳහන් කළේය.
මුල් අදියරේදී මගී ඩ්රෝන කිලෝමීටර් 25ක් දක්වා දුරක් සඳහා ක්රියාත්මක කිරීමට සැලසුම් කර ඇති අතර, සංචාරක ගමනාන්ත වෙත යන ගුවන් මාර්ග දෙකක් පිළිබඳවද අවධානය යොමුව තිබේ.
නියමු ව්යාපෘතියේ පළමු අදියර යටතේ කොළඹ සිට දකුණු වෙරළ තීරය දක්වා සහ කටුනායක සිට පෝට් සිටි දක්වා මාර්ග සම්බන්ධයෙන් අවධානය යොමු කර ඇති බවද ඔහු පැවසීය.
සැප්තැම්බර් මාසයේදී ඩ්රෝන යානා දෙකක් ශ්රී ලංකාවට ගෙන ඒමට අපේක්ෂා කරන අතර, නියමු ව්යාපෘතියේ පළමු මාස දෙක තුළ ඒවා ක්රියාත්මක කරන මාර්ග සහ ගුවන් ගමන් සැලසුම් සකස් කිරීමට නියමිතය.
සංචාරක කර්මාන්තය ප්රවර්ධනය කිරීම මෙම ව්යාපෘතියේ ප්රධාන අරමුණක් වන අතර, හදිසි අවස්ථා හා ආපදා ප්රතිචාර කටයුතු සඳහා මෙන්ම නාවික හා සාගර කටයුතු සඳහාද මෙම යානා භාවිත කිරීම පිළිබඳව සලකා බලමින් සිටින බව නියෝජ්ය අමාත්යවරයා සඳහන් කළේය.
මගී ඩ්රෝන යානා සඳහා ගුවන් ගත වීමට සහ ගොඩබෑමට සාපේක්ෂව අඩු ඉඩකඩක් පමණක් අවශ්ය වීම ඔවුන්ගේ ප්රධාන වාසියක් බවද ඔහු පෙන්වා දුන්නේය.
නියමු අත්හදා බැලීම් සාර්ථක වුවහොත් ඉදිරි මාස හය තුළ වාණිජ මගී ඩ්රෝන සේවාවක් ශ්රී ලංකාවේ ක්රියාත්මක කිරීමට රජය අපේක්ෂා කරන බව නියෝජ්ය අමාත්ය රුවන් කොඩිතුවක්කු මහතා වැඩිදුරටත් පැවසීය.
