චීන ජාතිකයන් 20 දෙනකු ඇතුළු කාර්ය මණ්ඩල සාමාජිකයන් 24 දෙනකු රැගත් පැනමා ධජය සහිත භාණ්ඩ ප්රවාහන නෞකාවක් ඉන්දියාවේ ඔඩිෂා වෙරළට ඔබ්බෙන් බෙංගාල බොක්කේදී ගිලී ගොස් තිබේ.
“එම්.වී. ඕෂන් විනර්” නමැති මෙම නෞකාව පසුගිය 20 වැනිදා රාත්රියේ ඔඩිෂා ප්රාන්තයේ පරාදීප් වරායෙන් සිංගප්පූරුව බලා පිටත්ව ඇති අතර, එහි ඔඩිෂාවෙන් රැගෙන ගිය යකඩ නිධි ටොන් 72,100ක් පමණ තිබූ බව වාර්තා වේ.
නෞකාව සමඟ සන්නිවේදන සබඳතා බිඳවැටීමෙන් අනතුරුව, ඔඩිෂා වෙරළට නාවික සැතපුම් 240ක් පමණ දුරින් එය ගිලී ඇති බව ඉන්දීය බලධාරීහු සඳහන් කරති.
නෞකාවේ සිටි 24 දෙනා අතර චීන ජාතිකයන් 20 දෙනකු, මියන්මාර ජාතිකයන් තිදෙනකු සහ බංග්ලාදේශ ජාතිකයකු සිටි බව සඳහන් වේ.
නෞකාව ගිලී යාමෙන් පසු ජීවිතාරක්ෂක යාත්රා දෙකක සිටි පුද්ගලයන් දෙදෙනකු අසලින් ගමන් කළ වෙළෙඳ නෞකාවක් මගින් මුදාගෙන තිබේ. ඉතිරි 22 දෙනා සොයා ඉන්දීය වෙරළාරක්ෂක බලකාය සහ නාවික හමුදාව ඒකාබද්ධ සෝදිසි හා මුදාගැනීමේ මෙහෙයුමක් ක්රියාත්මක කරමින් සිටී.
ඉන්දීය වෙරළාරක්ෂක බලකාය විසින් “වරද්” සහ “අන්මෝල්” නමැති නෞකා දෙකක් මෙහෙයුම සඳහා යොදවා ඇති අතර, “විජිත්” නමැති තවත් නෞකාවක්ද සහායට යවා තිබේ. ප්රදේශයේ ගමන් කරන අනෙකුත් නෞකාද සෝදිසි මෙහෙයුමට සහාය වන ලෙස දැනුම්වත් කර ඇත.
නෞකාව ගිලී යාමට හේතුව මෙතෙක් තහවුරු වී නොමැත. සන්නිවේදන සබඳතාව අහිමි වීමට පෙර නෞකාවේ යම් අනතුරු ඇඟවීමක් නිකුත් වී තිබුණේද යන්න සම්බන්ධයෙන්ද බලධාරීන් වැඩිදුර විමර්ශන සිදුකරමින් සිටී.
මේ වනවිට මෙහෙයුමේ ප්රධාන අවධානය වී ඇත්තේ ජීවිතාරක්ෂක යාත්රා සහ මුහුදේ සිටින පුද්ගලයන් සොයා ගැනීම වන අතර, අතුරුදන්ව සිටින කාර්ය මණ්ඩල සාමාජිකයන් පිළිබඳ තොරතුරු අනාවරණය කර ගැනීමට ඉන්දීය බලධාරීහු දැඩි උත්සාහයක නිරත වෙති.
නෞකාවේ ඉරණම සම්බන්ධයෙන් තොරතුරු ලැබීමත් සමඟ බෙංගාල බොක්ක හරහා ගමන් කරන අනෙකුත් නෞකා වෙතද අනතුරු ඇඟවීම් නිකුත් කර ඇති අතර, මුදාගැනීමේ මෙහෙයුම් තවදුරටත් ක්රියාත්මකය.
