ශ්රී ලංකන් ගුවන් සේවයට එයාර්බස් ගුවන් යානා මිලදී ගැනීමේදී සිදුවූ බව කියන අල්ලස් ගනුදෙනුවක් සම්බන්ධයෙන් රුපියල් මිලියන 100ක අල්ලසක් ලබාගත් බවට චෝදනා එල්ල වී රක්ෂිත බන්ධනාගාරගතව සිටින පාර්ලිමේන්තු මන්ත්රී නාමල් රාජපක්ෂ මහතාගේ ඇප ඉල්ලීම පිළිබඳ තීන්දුව සැප්තැම්බර් 29 වැනිදා ලබාදීමට කොළඹ ප්රධාන මහේස්ත්රාත් අධිකරණය නියම කර තිබේ.
අද (18) අධිකරණයේදී නාමල් රාජපක්ෂ මහතා වෙනුවෙන් පෙනී සිටි ජනාධිපති නීතිඥ ෂමින්ද්ර ප්රනාන්දු මහතා කරුණු දක්වමින්, මීට පෙර ඇප ඉල්ලීම සලකා බැලීමෙන් පසුව නව කරුණු කිහිපයක් මතුව ඇති බව සඳහන් කළේය.
ඒ අතර ඉන්දීය රජයෙන් නාමල් රාජපක්ෂ මහතාට ඉන්දියාවේ සංචාරයක් සඳහා ආරාධනයක් ලැබී ඇති බවත්, ලබන 26 වැනිදා හින්ගුරක්ගොඩ ඇසළ පෙරහැරට සමගාමීව විහාරස්ථානයක කොතක් පැළඳවීමේ ආගමික උත්සවයකට සහභාගි වීමටද නියමිතව ඇති බවත් විත්තිය අධිකරණයට දැනුම් දී තිබේ.
එමෙන්ම, එයාර්බස් ගනුදෙනුව සම්බන්ධ ජාත්යන්තර විමර්ශන වාර්තාවේ තම සේවාදායකයාගේ නම නොමැති බවත්, ව්යාපාරික නීමල් පෙරේරාගේ ප්රකාශවල විශ්වසනීයත්වය පිළිබඳ ගැටලු පවතින බවත් විත්තිය පෙන්වා දුන්නේය. එහෙත් අල්ලස් කොමිසම වෙනුවෙන් පෙනී සිටි නියෝජ්ය සොලිසිටර් ජනරාල් ජනක බණ්ඩාර මහතා සඳහන් කළේ මෙම කරුණු ඇප ලබාදීමට තරම් විශේෂ තත්ත්වයන් නොවන බවත්, සාක්ෂිකරුවන්ගේ විශ්වසනීයත්වය නඩු විභාගයේදී තීරණය කළ යුතු බවත්ය.
අල්ලස් කොමිසමට අනුව, මෙම විමර්ශනය ශ්රී ලංකන් ගුවන් සේවය වෙනුවෙන් ගුවන් යානා මිලදී ගැනීමේ ගනුදෙනුවකට සම්බන්ධ බව කියන රුපියල් මිලියන 100ක අල්ලස් ගෙවීමක් සම්බන්ධයෙන් සිදු කෙරෙයි. එම චෝදනා නාමල් රාජපක්ෂ මහතා ප්රතික්ෂේප කර තිබේ.
මේ අතර නාමල් රාජපක්ෂ මහතා මෙම අල්ලස් නඩුවට අමතරව එම ගනුදෙනුව සම්බන්ධ මුදල් විශුද්ධිකරණ විමර්ශනයකද සැකකරුවෙකු ලෙස නම් කර ඇති අතර, එම නඩුවෙන් ඔහු සැප්තැම්බර් 23 දක්වා රක්ෂිත බන්ධනාගාරගත කර තිබේ.
අද අධිකරණ නියෝගය අනුව විත්තියේ ලිඛිත කරුණු සැප්තැම්බර් 22 දක්වාත්, අල්ලස් කොමිසමේ කරුණු සැප්තැම්බර් 25 දක්වාත් ඉදිරිපත් කළ යුතු අතර, ඇප සම්බන්ධ තීන්දුව සැප්තැම්බර් 29 වැනිදා ප්රකාශ කිරීමට නියමිතය.
