කඩදාසි සංස්ථාවේ සභාපතිවරයා රැගෙන ඒම සඳහා කඩවත පිහිටි ඔහුගේ නිවසට යමින් සිටි රියැදුරකු කැබ් රථයද සමඟ අතුරුදන්ව ඇති බවට වැල්ලවත්ත පොලිසියට පැමිණිල්ලක් ලැබී තිබේ.
පොලිසිය සඳහන් කරන පරිදි මෙලෙස අතුරුදන්ව ඇත්තේ රාගම, කඳැලියද්දපාලුව ප්රදේශයේ පදිංචි 29 හැවිරිදි පුද්ගලයෙකි. ඔහු පෙරේදා (21) කොළඹ 06, ස්ටැෆර්ඩ් පාරේ පිහිටි කඩදාසි සංස්ථාවේ ප්රධාන කාර්යාලයෙන් පිටත්ව සභාපතිවරයාගේ කඩවත නිවස බලා යමින් සිටියදී මෙම සිදුවීම සිදුව තිබේ.
සභාපතිවරයා නිවසට කැබ් රථය නියමිත වේලාවට නොපැමිණීම හේතුවෙන් ඔහු රියැදුරුට දුරකතන ඇමතුමක් ලබාදී ඇති අතර, එහිදී කැබ් රථයේ ඉන්ධන කාන්දුවක් ඇති බව රියැදුරු පවසා ඇතැයි පොලිසිය සඳහන් කරයි.
ඒ අනුව සභාපතිවරයා විසින් කඩවත ප්රදේශයේ වාහන අලුත්වැඩියා කරන ස්ථානයක් පිළිබඳව රියැදුරුට දැනුම්දී එම ස්ථානයට කැබ් රථය රැගෙන ගොස් පරීක්ෂා කරවන ලෙස උපදෙස් දී තිබේ.
පොලිස් විමර්ශනවලදී අනාවරණය වී ඇත්තේ රියැදුරු එම ස්ථානයට ගොස් කැබ් රථය පෙන්වා ඇති අතර, එහි කිසිදු දෝෂයක් නොමැති බව එහි කාර්මිකයන් විසින් පවසා ඇති බවයි.
එහෙත් පසුවද රියැදුරු කාර්යාලයට නොපැමිණීම නිසා ඔහු සම්බන්ධ කර ගැනීමට සභාපතිවරයා උත්සාහ කර තිබේ. සවස 4.00 පමණ වන විට ඔහුගේ ජංගම දුරකතනයද විසන්ධි වී තිබූ බව පොලිසිය සඳහන් කරයි.
මේ සම්බන්ධයෙන් කඩදාසි සංස්ථාවේ ප්රවාහන කළමනාකරු සමන් ප්රියංකර ප්රනාන්දු මහතා විසින් වැල්ලවත්ත පොලිසියට පැමිණිල්ලක් ඉදිරිපත් කර තිබේ.
රියැදුරු සහ කැබ් රථය අවසන් වරට ගමන් කළ ස්ථාන හඳුනා ගැනීම සඳහා ඔහුගේ ජංගම දුරකතන දත්ත මෙන්ම මාර්ගයේ සහ අවට ස්ථානවල සීසීටීවී දර්ශන පරීක්ෂා කිරීමට පොලිසිය කටයුතු කරමින් සිටී.
රියැදුරු විසින් ඉන්ධන කාන්දුවක් ඇති බව පැවසීමත්, පසුව කාර්මිකයන් එවැනි දෝෂයක් නොමැති බව පවසා තිබීමත් සම්බන්ධයෙන්ද විමර්ශකයන්ගේ අවධානය යොමුව තිබේ.
කෙසේ වෙතත් රියැදුරුට සිදුවූයේ කුමක්ද, ඔහු කැබ් රථය සමඟ ගමන් කළේ කුමන දිශාවකටද සහ ඔහුගේ අතුරුදන්වීම පිටුපස කිසියම් අපරාධයක් තිබේද යන්න මෙතෙක් අනාවරණය වී නොමැත.
වැල්ලවත්ත පොලිස් ස්ථානාධිපති ප්රධාන පොලිස් පරීක්ෂක මොහාන් සිල්වා මහතාගේ උපදෙස් මත, විවිධ පැමිණිලි අංශයේ ස්ථානාධිපති උප පොලිස් පරීක්ෂක වී. ගනේවත්ත මහතා ඇතුළු කණ්ඩායමක් වැඩිදුර විමර්ශන සිදු කරති.
