29.5 C
Galle

වසර 49ක් අභ්‍යවකාශයේ ගමන් කරන කමල් ද ආබෲගේ හඬ ‘ආයුබෝවන්’

Published:

“ආයුබෝවන්!” යන සිංහල වචනය ශ්‍රී ලාංකිකයන් දිනපතා භාවිතා කරන සාමාන්‍ය ආචාරයකි. එහෙත් වසර 49කට ආසන්න කාලයකට පෙර ශ්‍රී ලාංකික විද්වතකුගේ හඬින් පටිගත කළ මේ වචනය අද පෘථිවියෙන් කිලෝමීටර් බිලියන 25.9කට වැඩි දුරකින් ගමන් කරන අභ්‍යවකාශ යානා දෙකක රැඳී තිබේ. ඒ වොයේජර් 1 සහ වොයේජර් 2 යානාවල රැගෙන යන රන් තැටියේ සටහන් වූ ආචාර්ය කමල් ද ආබෲ මහතාගේ හඬයි.

මිනිසා විසින් නිපදවන ලද වෙනත් කිසිදු වස්තුවක් ළඟා වී නොමැති දුරකට වොයේජර් 1 අභ්‍යවකාශ යානය අද (18) ළඟා වීමත් සමඟ මෙම ශ්‍රී ලාංකික හඬ පිළිබඳ කතාව යළිත් අවධානයට ලක්ව තිබේ.

ඇමෙරිකානු අභ්‍යවකාශ ආයතනය වන නාසා (NASA) ආයතනයේ ගණනය කිරීම් අනුව වොයේජර් 1 යානය පෘථිවියේ සිට එක් ආලෝක දිනක දුරක් සම්පූර්ණ කර ඇත්තේ අද ඇමෙරිකානු නැගෙනහිර වේලාවෙන් පෙරවරු 5.16ටය. එය ශ්‍රී ලංකා වේලාවෙන් පස්වරු 3.46ට පමණ වේ. ඒ වන විට යානය පෘථිවියේ සිට කිලෝමීටර් බිලියන 25.9කට ආසන්න දුරකින් ගමන් කරමින් සිටියේය.

ආලෝක දිනයක් යනු කාලය මනින ඒකකයක් නොව දුර මනින ඒකකයකි. එනම් ආලෝකය තත්පරයට කිලෝමීටර් 299,000කට ආසන්න වේගයෙන් පැය 24ක් තුළ ගමන් කරන දුරයි. ඒ අනුව පෘථිවියේ සිට වොයේජර් 1 වෙත යවන ගුවන්විදුලි සංඥාවක් එහි ළඟා වීමට පැය 24කට ආසන්න කාලයක් ගත වේ. යානයෙන් එවන සංඥාවක් පෘථිවියට ලැබීමට ද ඒ හා සමාන කාලයක් ගතවේ. එබැවින් යානය එම දුරට ළඟා වූ බවට අවසන් සංඥා තහවුරු කිරීම සඳහා නාසා ආයතනය බලා සිටියේය.

කෝනෙල් විශ්වවිද්‍යාලයෙන් විශ්වයට ගිය සිංහල හඬ

1977 වසරේදී වොයේජර් යානා දෙක අභ්‍යවකාශගත කිරීමට පෙර ඒවාට එක් කළ විශේෂ පණිවුඩයක් ලෙස රන් ආලේපිත තඹ තැටි දෙකක් සකස් කෙරිණි. ඒවා ‘වොයේජර් රන් තැටිය’ (Voyager Golden Record) ලෙස හැඳින්වේ. පෘථිවියේ ජීවය, සංස්කෘතිය සහ මිනිස් ශිෂ්ටාචාරය පිළිබඳ තොරතුරු අනාගතයේදී යම් බුද්ධිමත් ජීවීන්ට හමුවුවහොත් හඳුනාගත හැකි ආකාරයෙන් ඒවාට ඇතුළත් කිරීම එහි අරමුණ විය.

පෘථිවියේ ස්වභාවික ශබ්ද, සතුන්ගේ හඬ, සංගීතය, ඡායාරූප සහ භාෂා 55කින් පටිගත කළ ආචාර එම තැටියට ඇතුළත් කර තිබේ. එම භාෂා අතර සිංහල භාෂාවට ද ස්ථානයක් හිමි විය.

ශ්‍රී ලාංකික විද්‍යා සන්නිවේදකයකු වන නාලක ගුණවර්ධන මහතා 2012 වසරේ පළ කළ ලිපියක සඳහන් කරන්නේ සිංහල ආචාරය පටිගත කිරීමේ අවස්ථාව ආචාර්ය කමල් ද ආබෲ මහතාට අහම්බයෙන් ලැබුණු බවයි. ඒ කාලයේ ඔහු ඇමෙරිකාවේ කෝනෙල් විශ්වවිද්‍යාලයේ ආචාර්ය උපාධිය හදාරමින් සිටි පර්යේෂණ සිසුවෙකි. කාල් සේගන්ගේ කණ්ඩායම සිංහල භාෂාවෙන් කෙටි පණිවුඩයක් ලබාදෙන ලෙස කළ ඉල්ලීමකට අනුව ඔහු “ආයුබෝවන්” යන වචනය පටිගත කර දී තිබේ.

නාසා ආයතනයේ රන් තැටියේ භාෂා ලැයිස්තුවේ සිංහල ආචාරයේ ඉංග්‍රීසි අර්ථය “Wish You a Long Life” ලෙස දක්වා ඇත. එහි අදහස “ඔබට දීර්ඝායු වේවා” යන්නයි. එමඟින් සිංහල භාෂාව සහ ශ්‍රී ලාංකික සංස්කෘතිය පිළිබඳ කෙටි ආචාරයක් විශ්වයට රැගෙන යාමට අවස්ථාව ලැබී තිබේ.

කමල් ද ආබෲ කවුද?

කමල් ද ආබෲ මහතා හුදෙක් වොයේජර් යානාවට සිංහල වචනයක් පටිගත කරදුන් පුද්ගලයකු පමණක් නොවේ. ඔහු සිංහල භාෂාව පිළිබඳ විශේෂ අධ්‍යයනයන් කළ ශ්‍රී ලාංකික භාෂා විද්‍යාඥයකු සහ විශ්වවිද්‍යාල ආචාර්යවරයෙකි.

ශ්‍රී ලංකා ජාතික පුස්තකාලයේ ප්‍රකාශිත ශ්‍රී ලංකාවේ භාෂා විද්‍යා අධ්‍යයන ඉතිහාසය පිළිබඳ කෘතියක සඳහන් වන්නේ ඔහු 1963 වසරේදී කේම්බ්‍රිජ් විශ්වවිද්‍යාලයේදී ව්‍යවහාරික සිංහල භාෂාවේ ක්‍රියාපද කොටස පිළිබඳ පර්යේෂණයක් සිදුකර ඇති බවයි. පසුව කෝනෙල් විශ්වවිද්‍යාලයෙන් සිංහල භාෂාවේ නිෂේධාර්ථය පිළිබඳ වාක්‍ය ව්‍යුහය හා අර්ථය අධ්‍යයනය කරමින් ආචාර්ය උපාධිය සම්පූර්ණ කර තිබේ.

කෝනෙල් විශ්වවිද්‍යාලයේ භාෂා විද්‍යා අංශයේ ආදි ශිෂ්‍ය තොරතුරුවල ද ඔහුගේ නම 1981 වසරේ ආචාර්ය උපාධිධාරියකු ලෙස සටහන් වේ. ඔහුගේ පර්යේෂණ මාතෘකාව වූයේ “The Syntax and Semantics of Negation in Sinhala” යන්නයි.

ඔහු පේරාදෙණිය විශ්වවිද්‍යාලයේ සහ American National College හි මහාචාර්යවරයකු ලෙස සේවය කර ඇති බව කෝනෙල් විශ්වවිද්‍යාලයේ වාර්තාවල සඳහන් වේ. ශ්‍රී ලංකා විවෘත විශ්වවිද්‍යාලයේ භාෂා අධ්‍යයන වැඩසටහන් ආරම්භක අවධියේදී ද ඔහු වැදගත් දායකත්වයක් ලබා දී තිබේ. එහි ඉංග්‍රීසි භාෂාව සමාජ විද්‍යා අධ්‍යයන සඳහා අනිවාර්ය විෂයයක් බවට පත්කිරීමේ වැඩසටහන සහකාර මහාචාර්ය චිත්‍රා වික්‍රමසූරිය මහත්මිය සමඟ එක්ව සකස් කර ක්‍රියාත්මක කිරීමට ඔහු දායක වූ බව විවෘත විශ්වවිද්‍යාලයේ ඉතිහාස සටහනේ දැක්වේ.

එවැනි ශාස්ත්‍රීය පසුබිමක් සහිත ශ්‍රී ලාංකිකයකුගේ හඬින් පටිගත වූ “ආයුබෝවන්” යන වචනය අදත් අභ්‍යවකාශයේ ගමන් කිරීම මෙරට භාෂාවට මෙන්ම ශාස්ත්‍රීය ක්ෂේත්‍රයට ද සුවිශේෂී සටහනකි.

මිනිසාගේ දුරස්ථම තානාපතියා

වොයේජර් 1 යානය 1977 සැප්තැම්බර් 5 වැනිදා නාසා ආයතනය විසින් අභ්‍යවකාශගත කරන ලදී. මුලින් බ්‍රහස්පති සහ සෙනසුරු ග්‍රහයන් අධ්‍යයනය කිරීම සඳහා යොදාගත් එය පසුව සූර්යයාගෙන් පිටතට විහිදෙන අංශු හා චුම්බක ක්ෂේත්‍රවලින් සැදුම්ලත් හීලියෝස්පියරය පසුකර 2012 වසරේදී අන්තර් තාරකා අවකාශයට ඇතුළු විය. එමඟින් අන්තර් තාරකා අවකාශයට ඇතුළු වූ පළමු මිනිසා විසින් නිපදවූ යානය බවට එය පත්විය.

වසර පනහක් ගතවීමට ආසන්න වුවද, සීමිත බලශක්තියක් යටතේ එහි විද්‍යාත්මක උපකරණ සහ සන්නිවේදන පද්ධති හැකිතාක් කාලයක් ක්‍රියාත්මකව තබාගැනීමට නාසා ඉංජිනේරුවෝ කටයුතු කරති.

වොයේජර් 1 ආලෝක දිනක දුරට ළඟාවීම සැමරීම සඳහා නොවැම්බර් 17 වැනිදා රාත්‍රියේ ලොව පුරා ජනතාවට පහන් හෝ ජංගම දුරකථන ආලෝක භාවිතයෙන් ‘VGR’ යන සංඥා නාමය මෝස් කේතයෙන් දැක්වීමට ද නාසා ආයතනය ආරාධනා කළේය. එය යානයට සැබෑවටම පණිවුඩයක් යැවීමක් නොව, මානව වර්ගයාගේ අභ්‍යවකාශ ගවේෂණය සැමරීමේ සංකේතාත්මක ක්‍රියාවකි.

මීට වසර 49කට ආසන්න කාලයකට පෙර කෝනෙල් විශ්වවිද්‍යාලයේදී පටිගත කළ “ආයුබෝවන්” යන වචනය අදත් වොයේජර් යානා දෙකේ රන් තැටිවල සුරැකී තිබේ. එය කවදා හෝ පිටසක්වල බුද්ධිමත් ජීවියකුට ඇසෙන්නේද යන්න නොදන්නා නමුත්, මිනිසා තමන්ගේ භාෂාවෙන් විශ්වයට යැවූ සුබ පැතුම් අතර සිංහල වචනයක් ද තිබීම ශ්‍රී ලාංකිකයන්ට අමතක නොවන අභිමානයකි.

Related articles

spot_img
error: Content is protected !!