ඇමෙරිකාව විසින් ඉරාන වරායන් වෙත පනවා ඇති නාවික අවහිරතාවට (Blockade) ප්රතිචාර දක්වමින්, උපායමාර්ගිකව ඉතා වැදගත් වන හොර්මුස් සමුද්ර සන්ධිය (Strait of Hormuz) යළි වසා දැමීමට ඉරාන හමුදාව පියවර ගෙන තිබේ. සිකුරාදා දින තාවකාලිකව විවෘත කළ මෙම මුහුදු මාර්ගය මෙලෙස යළි වසා දැමීමත් සමඟ ජාත්යන්තර ඉන්ධන සහ වෙළඳ නාවික ගමනාගමනයට දැඩි බාධා එල්ල වී ඇත.
බ්රිතාන්ය සමුද්රීය වෙළඳ මෙහෙයුම් මධ්යස්ථානය (UKMTO) නිවේදනය කරන්නේ ඕමාන් වෙරළට ඔබ්බෙන් වූ මුහුදේදී තෙල් ප්රවාහන නෞකාවකට ඉරාන ගන්බෝට් (Gunboats) යාත්රා දෙකකින් වෙඩි ප්රහාර එල්ල වී ඇති බවයි. මීට අමතරව, ඕමාන් වෙරළට නාවික සැතපුම් 25ක් නුදුරින් ගමන් කළ බහාලුම් නෞකාවකට ද හඳුනා නොගත් ප්රහාරක අවියකින් (Projectile) ප්රහාරයක් එල්ල වී ඇති අතර, ඉන් බහාලුම් කිහිපයකට හානි සිදුව තිබේ.
අමෙරිකානු මධ්යම විධානය (CentCom) සඳහන් කරන පරිදි, අප්රේල් 13 වනදා ආරම්භ කළ මෙම නාවික අවහිරතාව හේතුවෙන් මේ වන විට නෞකා 23ක් ආපසු හරවා යැවීමට අමෙරිකානු බලකායන් පියවර ගෙන ඇත. ඉන්දීය ධජය යටතේ ගමන් කළ ‘JAG ARNAV’ සහ ‘SANMAR HERALD’ යන නෞකා ද හොර්මුස් සමුද්ර සන්ධියට ඇතුළු වීමට උත්සාහ කිරීමේදී ඉරාන විප්ලවීය ආරක්ෂක බලකාය (IRGC) විසින් ඒවා හරවා යවා ඇති බව නාවික දත්ත වාර්තා කරයි.
මේ අතර, මැදපෙරදිග තත්ත්වය තවදුරටත් සංකීර්ණ කරමින්, ලෙබනනයේ සාම සාධක මෙහෙයුම්වල නිරතව සිටි ප්රංශ සෙබළෙකු සන්නද්ධ කණ්ඩායමක වෙඩි ප්රහාරයකින් ජීවිතක්ෂයට පත්ව ඇති බව ප්රංශ ජනාධිපති එමානුවෙල් මැක්රොන් තහවුරු කළේය.
අමෙරිකානු ජනාධිපති ඩොනල්ඩ් ට්රම්ප් ඕවල් කාර්යාලයේ සිට නව විධායක නියෝග කිහිපයකට අත්සන් තබමින් සිටින අතර, හොර්මුස් සමුද්ර සන්ධියේ අර්බුදය සම්බන්ධයෙන් ඔහු ඉදිරි පැය කිහිපය තුළ විශේෂ ප්රකාශයක් කරනු ඇතැයි අපේක්ෂා කෙරේ. කෙසේ වෙතත්, කලාපය තුළ පවතින මෙම ගැටුම්කාරී වටපිටාව හේතුවෙන්, ට්රම්ප් මීට පෙර ප්රකාශ කළ “ඉක්මන් එකඟතාවකට පැමිණීමේ” හැකියාව පිළිබඳව දේශපාලන විශ්ලේෂකයෝ සැක පළ කරති.
