මෙරට දැනට ව්යාප්ත වෙමින් පවතින ඩෙංගු වෛරසය පෙර අවස්ථාවලට වඩා යම් වෙනස් ස්වභාවයක් ගන්නා බව සෞඛ්ය නියෝජ්ය අමාත්ය හංසක විජේමුණි මහතා පවසයි. වෛරසයේ පවතින මෙම වෙනස් ස්වභාවය නිසා, වෙනදාට වඩා වැඩි පිරිසකට රෝගය වැලඳීමේ දැඩි ප්රවණතාවක් සහ පැතිර යාමේ ඉහළ අවදානමක් පවතින බැවින් මහජනතාව ඒ පිළිබඳව දැඩි ලෙස විමසිලිමත් වෙමින් ආරක්ෂිත පියවර අනුගමනය කළ යුතු බව ඔහු අවධාරණය කළේය.
සාමාන්යයෙන් මෙරට සතියකට වාර්තා වන ඩෙංගු රෝගීන් සංඛ්යාව 1,000කට ආසන්න වුවද, මේ වන විට එම සීමාව ද ඉක්මවා ගොස් රෝගීන් වාර්තා වීම ගුණිතයක ආකාරයෙන් සීඝ්රයෙන් ඉහළ යමින් පවතින බව ජාතික ඩෙංගු මර්දන ඒකකයේ ප්රජා සෞඛ්ය විශේෂඥ, වෛද්ය ජගත් අමරසේකර මහතා මෙහිදී හෙළි කළේය. මේ හේතුවෙන් දෛනිකව රෝහල්ගත වන රෝගීන් සංඛ්යාව ද ඉහළ යමින් පවතින අතර, එය සෞඛ්ය අංශවල ධාරිතාවය ඉක්මවා ගියහොත් මරණ සංඛ්යාව ද ඉහළ යා හැකි බව ඔහු අනතුරු ඇඟවීය.
ජාතික ඩෙංගු මර්දන ඒකකයේ අධ්යක්ෂ වෛද්ය කපිල කන්නන්ගර මහතා කියා සිටියේ, මේ වසරේ මේ දක්වා ඩෙංගු රෝගයෙන් මියගිය අය අතර කුඩා දරුවන්, තරුණයින් සහ කාන්තාවන් ද සිටින බවයි. රටේ අනාගත පරපුර, ශ්රම දායකත්වය සපයන තරුණ ප්රජාව මෙන්ම දරුවන්ට මව්වරුන් අහිමි වීම ඉතා කනගාටුදායක තත්ත්වයක් බව හෙතෙම සඳහන් කළේය.
මදුරුවන් බෝවන ස්ථානවලින් 41.8%ක්ම පාසල්වලින්
ඩෙංගු මර්දන ඒකකයේ කීට විද්යාඥ සකුන්තලා ජානකී මහත්මිය පෙන්වා දුන්නේ, මේ දක්වා සිදුකළ පරිශ්ර පරීක්ෂාවලදී මදුරු කීටයන් සිටින ස්ථානවලින් වැඩිම ප්රතිශතයක් එනම් 41.8%ක්ම වාර්තා වී ඇත්තේ පාසල් ප්රමුඛ අධ්යාපන ආයතනවලින් බවයි. මේ වන විට කීට ඝනත්වය සහ මදුරුවන් බෝවන ස්ථාන 28,913ක් හමු වී ඇති අතර, ඉන් 26%ක්ම ඉවතලන ද්රව්යවලින් ද, 14%ක් තාවකාලිකව ඉවත් කළ අයිතම සහිත වඩා වැඩියෙන් මදුරුවන් බෝවන ප්රධාන ස්ථාන බව ඇය පැවසුවාය.
නීතිය තදින්ම ක්රියාත්මකයි
ශ්රී ලංකා පොලිසියේ පරිසර ආරක්ෂණ කොට්ඨාසයේ අධ්යක්ෂ, ජ්යෙෂ්ඨ පොලිස් අධිකාරී මනෝජ් පෙරේරා මහතා සඳහන් කළේ මදුරුවන් බෝවීමේ වැඩි සම්භාවිතාවක් ඇති ඉදිකිරීම් පරිශ්රයන් තුළ කීටයන් හමු වුවහොත් ඒ පිළිබඳ පරිසර පොලිසියට පැමිණිලි කළ හැකි බවයි. එහිදී අපරාධ නඩු විධාන සංග්රහයේ 98 වන වගන්තිය යටතේ අදාළ පරිශ්රයට එරෙහිව මහේස්ත්රාත්වරයෙකුගෙන් තහනම් නියෝගයක් ලබා ගැනීමට කටයුතු කරන බව ද හෙතෙම පැවසීය.
ජාතික ඩෙංගු මර්දන සතියේ වැඩසටහන:
දිවයින පුරා දැනට පවතින දැඩි අවදානම් ඩෙංගු රෝගී තත්ත්වය මර්දනය කිරීමේ අරමුණින් රාජ්ය ආයතන, සෞඛ්ය අංශ සහ ශ්රී ලංකා පොලිසිය ඒකාබද්ධව ක්රියාත්මක කරනු ලබන “ජාතික ඩෙංගු මර්දන සතිය” හෙට (15) සිට ජූනි 20 වැනිදා දක්වා ක්රියාත්මක වන බව සෞඛ්ය අමාත්යාංශය පවසයි.
මෙම විශේෂ මර්දන සතිය පිළිබඳව සියලුම අංශ දැනුවත් කිරීමේ විශේෂ සාකච්ඡාවක් පළාත් සභා සහ පළාත් පාලන නියෝජ්ය අමාත්ය රුවන් සෙනරත් මහතාගේ ප්රධානත්වයෙන්, ජාතික ඩෙංගු මර්දන ඒකකයේ වෛද්යවරුන් සහ පොලිස් පරිසර ආරක්ෂණ කොට්ඨාසයේ නිලධාරීන්ගේ සහභාගිත්වයෙන් ඊයේ (14) පැවැත්වුණි. එහිදී අදහස් දැක්වූ නියෝජ්ය අමාත්යවරයා අවධාරණය කළේ ඩෙංගු රෝගය අප ජීවත්වන වටපිටාව ආශ්රිතව නිර්මාණය වන්නක් බැවින්, මහජනතාවගේ සෘජු දායකත්වයකින් තොරව සෞඛ්ය අංශවලට හෝ රජයේ ආයතනවලට පමණක් මෙය මර්දනය කළ නොහැකි බවයි.
ජූනි 20 (සෙනසුරාදා): පෞද්ගලික නිවාස සහ නිවාස අවට පරිශ්රයන් පිරිසිදු කිරීම.
ජූනි 15 සිට 17 දක්වා (සඳුදා – බදාදා): නගර, කාණු පද්ධති, වෙළඳ සංකීර්ණ, ආගමික ස්ථාන සහ බස් නැවතුම්පොළ ඇතුළු පොදු ස්ථාන පිරිසිදු කිරීම.
ජූනි 18 (බ්රහස්පතින්දා): පාසල්, පෙර පාසල් සහ පෞද්ගලික උපකාරක පන්ති ඇතුළු සියලුම අධ්යාපන ආයතන පරිශ්ර පිරිසිදු කිරීම.
ජූනි 19 (සිකුරාදා): සියලුම රාජ්ය සහ පෞද්ගලික ආයතන මෙන්ම කර්මාන්තශාලා පරිශ්ර පිරිසිදු කිරීම.
